29 აპრილიდან 1-ლი მაისის ჩათვლით, აჭარა მე-4 საერთაშორისო გამოფენა "ექსპო ბათუმი 2011"-ს უმასპინძლებს. "აჭარის ტურიზმის სააგენტოს" ხელმძღვანელის, სოფო ნიკოლაიშვილის განმარტებით, საგამოფენო პავლიონი საკმაოდ დიდ ფართობზე იქნება გადაჭიმული და გამოფენაში გაცილებით მეტ კომპანიას მიეცემა მონაწილეობის საშუალება.
"წელს გამოფენა იქნება გაცილებით მასშტაბური ვიდრე შარშან, რადგანაც 2010 წელს საგამოფენო პავილიონები 1000 კვ/მ-ზე იყო გადაჭიმული, წელს კი ტურისტულ კომპანიებს საკუთარი სტენდების განთავსების საშუალება უკვე 3000 კვ/მ-ზე ექნებათ"- აღნიშნა "აჭარის ტურიზმის სააგენტოს" ხელმძღვანელმა, სოფო ნიკოლაიშვილმა.
"ექსპო ბათუმი 2011"-ის ინიციატორი აჭარის ტურიზმის დეპარტამენტი, ხოლო ორგანიზატორი - "აჭარის ტურიზმის სააგენტოა".
ნიკოლაიშვილი ამბობს, რომ "ექსპო ბათუმი 2011"-ში მონაწილეობას მრავალი კომპანია მიიღებს.
"გამოფენაზე თურქეთი საკმაოდ სოლიდურად იქნება წარმოდგენილი. თურქული ტურისტული კომპანიები დაახლოებით 1000 კვ/მ ფართობს აითვისებენ. ადგილობრივი და თურქული კომპანიების გარდა გამოფენაში მონაწილეობას მიიღებენ ასევე ტურისტული კომპანიები: უკრაინიდან, ლატვიიდან, ლიტვიდან, ესტონეთიდან, ბელორუსიდან, რუმინეთიდან, ისრაელიდან და "ექსპო ბათუმის" ისტორიაში გამოფენაში მონაწილეობას მიიღებენ კომპანიები ყაზახეთიდან. ანუ გამოფენაზე წარმოდგენილი იქნება ის ქვეყნები, რომელიც აჭარის სამიზნე ბაზრებს წარმოადგენენ.
რაც შეეხება ტურისტულ კომპანიებს, ადგილზე შესაძლებლობა ექნებათ ერთმანეთთან ხელშეკრულებები გააფორმონ და საკუთარი ბიზნეს წინადადებები გაცვალონ"- განაცხადა "აჭარის ტურიზმის სააგენტოს" ხელმძღვანელმა სოფო ნიკოლაიშვილმა.
აღსანიშნავია, რომ "ექსპო ბათუმი 2011"-ის მხარდამჭერები არიან აჭარის მთავრობა და ქალაქ ბათუმის მერია, ხოლო გენერალური საინფორმაციო მხარდამჭერია აჭარის ტელევიზია.