"ბი ჯი კაპიტალის" ინფორმაციით, საქართველოს სამომხმარებლო ფასების ინდექსი თებერვალში გასულ თვესთან შედარებით 2.8%-ით გაიზარდა, ხოლო წლიური ინფლაცია 13.7%-ს გაუტოლდა (მაშინ, როდესაც იანვარში სამომხმარებლო ფასების წლიურმა ზრდამ 12.3% შეადგინა).
სამომხმარებლო ფასების ინდექსის ზრდა კვლავ განპირობებული იყო სურსათზე ფასების ზრდით, რომელმაც 28.4% შეადგინა წინა წელთან შედარებით, ხოლო ტრანსპორტის ფასები 7.8%-ით გაიზარდა გასულ წელთან შედარებით, რომელიც განპირობებულია ნავთობ პროდუქტებზე გლობალური ფასების ზრდით.
"2011 წლის დასაწყისში სამომხმარებლო ფასების ზრდა მნიშვნელოვნად გამოწვეულია საკვებ პროდუქტებზე გლობალური ფასების ზრდით. არ გამოვრიცხავთ ფასების ზრდას მომავალი რამდენიმე თვის განმავლობაში, თუმცა ჯერ კიდევ შესაძლებელია, ინფლაცია ერთციფრიან ნიშნულს დაუბრუნდეს მიმდინარე წლის მეორე ნახევარში", - აცხადებს ბი ჯი კაპიტალის სააქციო კაპიტალის ბაზრის ანალიტიკოსი გიორგი ირემაშვილი.
შეგახსენებთ, რომ სს "ბი ჯი კაპიტალი" (ყოფილი "გალტ ენდ თაგგარტ სექიურითის"), წარმოადგენს საქართველოში მოწინავე საინვესტიციო ბანკს, რომელიც დაარსდა 2000 წელს. კომპანია სთავაზობს კლიენტებს სრულ საინვესტიციო საბანკო მომსახურებას განვითარებადი ბაზრის მქონე ქვეყნებში დაყოფილ საბჭოთა კავშირის რესპუბლიკებში, ძირითადად საქართველოში, უკრაინასა და ბელარუსიაში. კომპანიის საქმიანობის პრიორიტეტული მიმართულებებია საბროკერო მომსახურება აქციებისა და ობლიგაციების შეძენაში, კვლევების ჩატარება, და კლიენტებისათვის საინვესტიციოკაპიტალის მოზიდვა.
2010 წელს, პრესტიჟულმა გამომცემლობამ, "Euromoney"-მ, სს "ბი ჯი კაპიტალი" დაასახელა განვითარებად ბაზრებზე მოქმედ საუკეთესო საინვესტიციო ბანკად ცენტრალურ და აღმოსავლეთ ევროპაში.
