ფინანსთა მინისტრი კახა ბაინდურაშვილი აგრარული უნივერსიტეტის ეკონომიკურ-ჰუმანიტარული ფაკულტეტის სტუდენტებს შეხვდა. მინისტრმა მათ ქვეყნის ეკონომიკაში არსებული ვითარება, მთავრობის ფისკალური პოლიტიკა და ის ღონისძიებები გააცნო, რომელიც ტარდება ეკონომიკის ზრდის ხელშეწყობის, ინფლაციური წნეხის შემცირების კუთხით.
"ძირითადი აქცენტი გაკეთდა სოფლის მეურნეობაზე: როგორია სოფლის მეურნეობის წილი დღევანდელ ეკონომიკაში და როგორ შეიძლება დარგი განვითარდეს ისე, რომ შემდგომში, ზრდა გადაედოს სხვა სექტორებსაც. ასევე, ვისაუბრეთ საზოგადოებისთვის, მათ შორის, ახალგაზრდობისთვის აქტუალურ ისეთ თემებზე, როგორიცაა სახელმწიფოს როლი ეკონომიკაში, სახელმწიფო ვალი, საგადასახადო კოდექსით გათვალისწინებული ნორმები და სხვა. მოვისმინეთ სტუდენტების მოსაზრებებიც ამ თემებზე", - განაცხადა ბაინდურაშვილმა.
"უნივერსიტეტის დასრულების შემდეგ ამ ახალგაზრდებს უნდა ჰქონდეთ უახლესი ინფორმაცია საქართველოს ეკონომიკაში მიმდინარე პროცესებსა და ტენდენციებზე, ამდენად, ასეთი ტიპის საჯარო ლექციები ხელს შეუწყობს მათი ცოდნის ამაღლებას", - განაცხადა აგრარული უნივერსიტეტის რექტორმა ლაშა გოცირიძემ.
პრეზენტაციის დასრულების შემდეგ ფინანსთა მინისტრმა უპასუხა სტუდენტების მიერ დასმულ შეკითხვებს.