თბილისის საკრებულოს "ქრისტიან-დემოკრატმა" წევრმა ზაზა გაბუნიამ სახელმწიფო კანცელარიასთან ბრიფინგი გამართა. ბრიფინგის თემა თბილისში დამწვრობის ცენტრის გაუქმება იყო. გაბუნიას თმით, დამწვრობის ცენტრის დახურვა დიდი შეცდომა იქნება.
გაბუნიას თქმით, მრავალგანყოფილებიანი დამწვრობის ცენტრი იძულებული იქნება მხოლოდ ერთი განყოფილებით გააგრძელოს მუშაობა, რაც მისი სრულყოფილი ფუნქციონირებისთვის ხელისშემშლელი გარემოება იქნება. როგორც მან აღნიშნა, უმძიმეს მდგომარეობაში მყოფ პაციენტებს რიგში დგომა მოუწევთ, რადგან ერთგანყოფილებიანი კლინიკა მხოლოდ 10 პაციენტის მომსახურებას შეძლებს, ცენტრის დახურვით კი უმუშევარი დარჩება 150-ზე მეტი თანამშრომელი.
"დამწვრობის ცენტრის დახურვა იქნება დიდი შეცდომა, ამიტომ მოვუწოდებ კომპანია "ნიუ ჰოსპიტალს", გადახედოს თავის გადაწყვეტილებას და მე-5 საავადმყოფოს ბაზაზე უზრუნველყოს ყველა პირობა დამწვრობის ცენტრის არა სანახევრო, არამედ სრულყოფილი მუშაობისთვის, სადაც გათვალისწინებული იქნება ბავშვთა და მოზრდილთა რეანიმაციული განყოფილებები მინიმუმ 30 პაციენტზე", - განაცხადა გაბუნიამ.
გაბუნიას თქმით, საქართველოს თერმულ დაზიანებათა და აღდგენითი პლასტიკური ქირურგიის სამედიცინო (დამწვრობის) ცენტრი ასეთი პროფილის ერთადერთი დაწესებულებაა სამხრეთ კავკასიაში.
