სოფლის მეურნეობის სექტორში, მიკროსაფინანსო ორგანიზაციების მიერ ("კრედო", "ფინკა", "ფინაგრო" და "ლაზი კაკაპიტალი") გაცემული სესხების რაოდენობა 5 მილიონ 300 ათას დოლარს შეადგენს, რაც 627 ბენეფიციარს მოიცავს. როგორც დღეს პარლამენტის აგრარული კომიტეტის სხდომაზე "სოფლის განვითარების პროექტის" დირექტორმა ალექსანდრე ლუთუაშვილმა განაცხადა, ორი წლის წინ ამ მიმართულებით კომერციულ ბანკებთან მჭიდრო თანამშრომლობა მიმდინარეობდა.
"ორი წლის წინ ჩვენ ასევე აქტიურად ვიყავით ჩართულები კომერციულ ბანკებთან ურთიერთობაში და მათი მხრიდან დახლებით 5 მილიონი დოლარის ათვისება მოხდა, რაც სოფლის მეურნეობის სექტორში დასაქმებულ ორგანიზაციებზე გაიცა. პროექტის ფარგლებში დაფინანსდა მრავალი სექტორი, მათ შორის კვერცხის და წიწილების წარმოება, მეღვინეობა, რძის პროდუქტების და სოკოს წარმოაბა"- განაცხადა ალექსანდრე ლუთუაშვილმა. მისივე თქმით, წარმოების გასაზრდელად სესხი მიიღეს: "კოდამ", "სავანეთმა", "კუმისმა", "თბილღვინომ", "თელვის ღვინის მარანმა" და სხვა.
ლუთუაშვილის თქმით, პროექტის ფარგლებში, ასათვისებელია კიდევ 4 მლნ. დოლარი, რაზეც მოლაპარაკებები მიკროსაფინანსო ორგანიზაციებთან მიმადინარეობს.
საქართველოს მთავრობამ "განვითარების საერთაშორისო ასოციაციასთან" და ,,სოფლის მეურნეობის განვითარების საერთაშორისო ფონდთან" 2005 წელს "სოფლის განვითარების პროექტის" (RDP) დაფინანსების ხელშეკრულებები გააფორმა. ამ ხელშეკრულებების თანახმად საქართველოსთვის 10 წლიანი საკრედიტო ხაზისთვის გათვალისწინებული რესურსი შეადგენდა 16.2 მლნ. აშშ დოლარს საკმაოდ იაფი ლიბორ + 2 საპროცენტო განაკვეთით, საიდანაც კომერციული ბანკებისთვის გამოყოფილი იყო 10.4 მლნ. აშშ დოლარი, ხოლო არასაბანკო ფინანსური დაწესებულებებისთვის (მიკროსაფინანსო ორგანიზაციებისთვის) 5.8 მლნ. აშშ დოლარი. აღნიშნული თანხა სოფლად გაცემული კრედიტების სახით აუცილებლად უნდა იყოს ათვისებული 2011 წლის 1 ივლისამდე. ფულადი რესურსები, რომელიც დარჩება აუთვისებელი ამ პერიოდისათვის, საქართველოს ეკონომიკა კარგავს და ეს პოტენციურად გამოსაყენებელი იაფი რესურსი გადანაწილდება სხვა ქვეყნებზე.
საქართველოს მიკროსაფინანსო ორგანიზაციების განვითარებისა და მხარდაჭერის ასოციაციის ინფორმაციით, აღნიშნული პროექტის ფარგლებში 2007-2008 წლებში ბანკებმა გასცეს სულ 24 სესხი, ხოლო 2009 - 2010 წლების განმავლობაში ბანკებს საერთოდ არ გამოუყენებიათ საკრედიტო ხაზის რესურსები, ამიტომ მათვის გამოყოფილ თანხებიდან 4 მლნ. აშშ დოლარამდე დღემდე აუთვისებელია. ამასთან ერთად, 2009 წელს ბანკებამ 3,2 მლნ. აშშ დოლარი დააბრუნეს პროექტის საბრუნავ ანგარიშზე. აქედან გამომდინარე თანხა, რომელიც შეიძლება ათვისებული იქნას სოფლის მეურნეობის დაკრედიტებისათვის 2011 წლის 1 ივლისამდე, ჯამურად შეადგენს 6,5 მლნ. აშშ დოლარს.
2010 წლის 31 დეკემბრის მდგომარეობით საბანკო სექტორში სოფლის მეურნეობაზე გაცემული სესხების ხვედრითი წილი მთლიან საკრედიტო პორტფელში მხოლოდ 3%-ს შეადგენს, ხოლო მიკროსაფინანსო ორგანიზაციებში ანალოგიურმა მაჩვენებელმა შეადგინა 27,2%. აღსანიშნავია, რომ 51 მიკროსაფინანსო ორგანიზაციიდან მხოლოდ 11 გასცემს სესხს სოფლად.
კომერციული ბანკების მიერ სოფლის მეურნეობაზე გაცემული კრედიტების სიდიდემ 47,2 მილიონი ლარიშეადგინა, ხოლო მიკროსაფინანსო ორგანიზაციების მიერ გაცემული სესხების მოცულობა 62.2 მლნ. ლარის ტოლია და ეს მაშინ, როდესაც მიკროსაფინანსო ორგანიზაციების აქტივები კომერციული ბანკების აქტივების სულ 2,9%-ს შეადგენს. სოფლის მეურნეობის განვითარებისათვის მიკროსაფინანსო ორგანიზაციებს 2011 წლის 1 იანვრის მდგომარეობით გაცემული აქვთ კრედიტები 49526 მსესხებელზე.
მიკროსაფინანსო ორგანიზაციები წარმოადგენენ საფინანსო საკრედიტო სისტემის განუყოფელ ნაწილს და თავისი სპეციფიკიდან გამომდინარე ხელს უწყობენ მცირე ბიზნესის განვითარებას, როგორც ქალაქად ასევე სოფლად, აფინანსებენ მცირე და დამწყებ ფერმერულ მეურნეობებს და გლეხებს.
მიკროსაფინანსო ორგანიზაციები ამ პროექტში მხოლოდ ბოლო ორი წელიწადია რაც ჩაერთვნენ, მაგრამ 5-მა მიკროსაფინანსო ორგანიზაციამ ბანკებისგან განსხვავებით მოკლე პერიოდში (წელიწადნახევარში) შეძლეს აეთვისებიათ მიკროსაფინანსო ორგანიზაციებისათვის პროექტით გათვალისწინებული ლიმიტზე უფრო მეტ საკრედიტო რესურსი და გასცეს 7,3 მლნ. აშშ დოლარის ოდენობით სოფლად მიზნობრივი სესხები ნაცვლად 5,8 მლნ აშშ დოლარისა. იმის გამო, რომ მიკროსაფინანსო ორგანიზაციების მიერ სასესხო თანხების ათვისების მოცულობა ამ პროექტში შეზღუდულია, ერთის მხრივ, 2 მლნ. აშშ დოლარის ზედა ზღვრით და, მეორეს მხრივ, მათი საკუთარი კაპიტალის 50%-ით, პროექტში მონაწილე მიკროსაფინანსო ორგანიზაციებმა სრულად ამოწურეს სესხების გაცემის შესაძლებლობა მითითებული შეზღუდვის პარამეტრებიდან გამომდინარე.
