ფინანსთა მინისტრმა კახა ბაინდურაშვილმა სსიპ ფინანსთა სამინისტროს შემოსავლების სამსახურის უფროსის თანამდებობაზე დასამტკიცებლად, პრემიერ-მინისტრ ნიკა გილაურს ჯაბა ებანოიძის კანდიდატურა წარუდგინა, რომელსაც მანამდე იუსტიციის მინისტრის მოადგილისა და აღსრულების ეროვნული ბიუროს თავმჯდომარის პოსტი ეკავა.
კანდიდატურის განხილვა და ოფიციალური გადაწყვეტილების მიღება, 10 მარტს, პრემიერ-მინისტრის საქართველოში დაბრუნების შემდეგ მოხდება,
ფინანსთა სამინისტროს ინფორმაციით, ჯაბა ებანოიძე დაიბადა 1971 წლის 31 ოქტომბერს.
1990-1995 წლებში სწავლობდა საქართველოს ტექნიკური უნივერსიტეტის საინჟინრო გეოდეზიურ ფაკულტეტზე. იყო ამავე ფაკულტეტის უმცროსი მეცნიერ-თანამშრომელი.
1995-1996 წლებში მუშაობდა ნაგებობათა დიაგნოსტირებისა და მონიტორინგის ცენტრში გეოდეზიური ჯგუფის ხელმძღვანელად.
1997 წელს იყო შპს "NEO-ს" ამზომველთა ჯგუფის უფროსი 1998 წელს კი - შპს "GEO-ს" გენერალური მენეჯერი.
1998 წლიდან ხელმძღვანელობდა რამდენიმე საერთაშორისო პროექტს:
1998-2000 წწ. - "მიწის ბაზრის განვითარების" პროექტის მონიტორინგის ჯგუფის ხელმძღვანელი;
2001-2003 წწ. - „მიწის ბაზრის განვითარების" პროექტის მენეჯერი;
2002-2003 წწ. - "მიწის პოლიტიკის შესახებ დილოგის" პროექტის დირექტორი;
2003-2006 წწ. - "საქართველოში თემთა მობილიზაციის ინიციატივათა ხელშეწყობის" პროექტის დირექტორი.
1995 წლიდან - 2005 წლამდე მუშაობდა მიწის მესაკუთრეთა უფლებების დაცვის ასოციაციის დირექტორად.
2005-2006 წლებში ხელმძღვანელობდა დონორი ორგანიზაციების მიერ დაფინანსებულ რამდენიმე პროექტს, იყო ACDI/AGVavagate-ის ტექნიკური დახმარების, მსოფლიო ბანკის საზღვრების დემარკაციისა და კოლხეთის ნაციონალური პარკისათვის მიწების გაცემის, აშშ-ს საერთაშორისო განვითარების სააგენტოს (USAID) მიწის ბაზრის განვითარების, KFW-ს მიწის კადასტრისა და რეგისტრაციის და სხვა პროექტების დირექტორი.
2006 წლიდან მუშაობდა საქართველოს იუსტიციის სამინისტროს საჯარო რეესტრის ეროვნული სააგენტოს თავმჯდომარის თანამდებობაზე.
2009 წლის იანვრიდან დაინიშნა საქართველოს იუსტიციის მინისტრის მოადგილედ, ხოლო 2010 წლის ივნისიდან ეკავა აღსრულების ეროვნული ბიუროს თავმჯდომარის თანამდებობა.
