2011 წლის ბოლომდე ზეთისხილი ქვეყნის მასშტაბით 500 ჰექტარზე გაშენდება, ამის შესახებ ჯი-ეიჩ-ენთან" საუბრისას სოფლის მეურნეობის მინისტრმა ბაკურ კვეზერელმა განაცხადა. მინისტრის თქმით, პლანტაციების გაშენების შემდეგ შესაძლებელია საქართველოში წარმოებული ზეთის ხილი ექსპორტზეც გავიდეს.
"წელს ზეთისხილის პლანტაცია დაახლოებით 500 ჰექტარზე გაშენდება და შესაბამისად ამ ბიზნესით დაკავებულ ახალ ინვესტორებს სტიმულს მისცემს, რადგანაც დღეს ბევრმა არ იცის, რომ საქართველოს კლიმატიდან გამომდინარე ქვეყანაში ზეთის ხილის წარმოების უდიდესი პოტენციალია"- განაცხადა ბაკურ კვეზერელმა.
მინისტრის თქმით, ქვეყანაში ზეთისხილის წარმოებით, თურქ ინვესტორებთან ერთად ისრაელელი ინვესტორებიც არიან დაინტერესებულნი. მინისტრი ამბობ, რომ ზეთის ხილის პლანტაციის პროექტში ადგილობრივი ინვესტორებიც არიან ჩართულნი.
"ჩვენი მიზანია, რომ ახალი საექსპორტო პროდუქცია ვაწარმოოთ. ვაწარმოოთ პლანტაციური ტიპით მოცვი, ნუში, ზეთისხილი, ბროწეული, კივი. ანუ ის პროდუქცია, რომელზედაც დიდი მოთხოვნა და მისი პოტენციალი საქართველოში არსებობს. ჩვენი ტრადიციული საექსპორტო პროდუქციის ღვინის, თხილისა და ციტრუსის გვერდით უკვე ვიხილავთ როგორც ზეთისხილს, ასევე ნუშს და სხვა პროდუქტებს"- განაცხადა სოფლის მეურნეობის მინისტრმა.
შეგახსენებთ, რომ გასულ წელს თურქული კომპანიები "ჯეოლაივი" სიღნაღში ზეთისხილის პლანტაციიების გაშენებით დაინტერესდა.
"ჯეოლაივი" საქართველოში 2009 წელს თურქეთში მცხოვრები ქართველების მიერ დაფუძნდა, ხოლო მისი ქართველი პარტნიორი "კეპიტალ ფართნერს ოფ ჯორჯიაა".
"კეპიტალ ფართნერს ოფ ჯორჯია" 1200 ჰექტარ ნაკვეთს ფლობს კოლხეთის დაბლობში, გურიისა და სამეგრელოს რაიონებს შორის. კომპანიამ უკვე განახორციელა 1.2 მილიონი ლარის ინვესტიცია აგრარულ სფეროში.
პროექტის დაწყებამდე, თურქეთის მხარემ საფუძვლიანი კვლევა ჩაატარა, რის შედეგადაც დაადგინა, რომ კახეთში, იმერეთში, მარნეულსა და გურიის რეგიონში ზეითუნის წარმოებისათვის შესაბამისი კლიმატი არსებობს. 2009 წლის დასაწყისში თურქეთის რესპუბლიკის ხელისუფლებამ სპეციალურად ამ პროექტისათვის კანონმდებლობაში ცვლილება შეიტანა, რომლის ძალითაც, სერტიფიცირებული ზეთისხილის ნერგები საექსპორტოდ გათავისუფლდა. მომზადდა სავარგულები, დაიხნა და გაფხვიერდა აქამდე უნაყოფო და გამოუყენებელი მიწები.
