ახალი სამარშრუტო ტაქსების შემოყვანის შემდეგ მგზავრობის საფასური არ გაიზრდება. ამის შესახებ დედაქალაქის მერმა გიგი უგულავამ განაცხადა და განმარტა, რომ გარკვეული კატეგორიის მოქალაქეები შეღავათებითაც კი ისარგებლებენ.
"გარდა იმისა, რომ ახალი სამარშრუტო ტაქსები იქნება ახალი და უსაფრთხო, არ გაიზრდება ფასი, რადგან არსებული სისტემა იძლევა რეზერვის საშუალებებს. მეტიც, ამუშავდება გადახდის ელექტრონული სისტემა, რომელიც მგზავრს მისცემს სხვადასხვა ფასდაკლების შესაძლებლობას", - განმარტა უგულავამ.
მისი თქმით, ფასის სხვაობას, როგორც ეს ავტობუსებითა და მეტროპოლიტენით მგზავრობის შემთხვევაში ხდება, დედაქალაქის მერია დაფარავს.
"შეღავათით ისარგებლებს სოციალურად დაუცველი 120 ათასი თბილისელი. მათზე გავრცელდება იგივე შეღავათი, რითაც ისინი ავტობუსებითა და მეტროპოლიტენით მგზავრობის დროს სარგებლობებენ. ამ განსხვავებას თბილისის მერია დაფარავს", - აღნიშნა უგულავამ.
წლის ბოლომდე 3200 ახალი სამარშრუტო ტაქსი შემოვა.