პარლამენტის ბიზნესსაბჭოს პირველი სხდომა 2 მარტს გაიმართება.
აღნიშნულის შესახებ დავალება პარლამენტის ბიუროს დღევანდელ სხდომაზე საკანონმდებლო ორგანოს სპიკერმა, საფინანსო-საბიუჯეტო და დარგობრივი ეკონომიკისა და ეკონომიკური პოლიტიკის კომიტეტების თავმჯდომარეებს, ზურაბ მელიქიშვილსა და გიორგი მელაძეს მისცა.
"რამდენიმე ხნის წინ პარლამენტში შედგა პირველი შეკრება ბიზნესის წარმომადგენლებთან და მაშინ შევთანხმდით, რომ შეიქმნებოდა ბიზნესსაბჭო, რომელიც რეგულარულად იმუშავებდა. ამიტომ მელიქიშვილს და მელაძეს, როგორც ამ დარგის წამყვანი კომიტეტების თავმჯდომარეებს მინდა დავალება მივცე, რომ ამ კვირაში საბჭოს პირველი სხდომა ჩაატარონ", - აღნიშნა ბაქრაძემ.
მისივე თქმით, ბიზნესსაბჭოს შექმნის ინიციატივას პარლამენტის წევრების მხრიდან დიდი ინტერესი მოჰყვა, თუმცა საბოლოოდ მიღებული გადაწყვეტილებით, მასში კომიტეტების თავმჯდომარეები შევლენ.
"ჩვენი მიზანი იყო ბიზნესსაბჭოში მაქსიმალურად ჩაგვერთო ბიზნესმენები და ბიზნესასოციაციების წევრები, რომლებიც ბიზნესის ფართო სპექტრს ფარავენ", - დასძინა პარლამენტის თავმჯდომარემ.
ამასთან, ბაქრაძის შეფასებით, აუცილებელია ბიზნესმა მუდმივად იგრძნოს, რომ ხელისუფლებას, სახელისუფლებო ინსტიტუციებსა და სტრუქტურებს მის მიმართ პარტნიორული დამოკიდებულება აქვს.
"ბიზნესთან ურთიერთობა არის არა თვითმიზანი, არამედ გზა იმისკენ, რომ ამუშავდეს ქვეყნის ეკონომიკა და დავეხმაროთ მოქალაქებს იმ პრობლემების გადალახვაში, რომელსაც ქმნის ინფლაცია და ფასების ზრდა", - განაცხადა დავით ბაქრაძემ.