"საქართველოში დიზელის საწვავის იმპორტი 2005 წლის შემდეგ მუდმივად იზრდება", _ ამის შესახებ ნავთობპროდუქტების იმპორტიორთა კავშირში აცხადებენ.
კავშირის ინფორმაციით, 2010 წლის შედეგებით განხორციელდა 26 ათასი ტონით მეტი დიზელის საწვავის იმპორტი 2009 წლის მაჩვენებელთან შედარებით.
რაც შეეხება ბენზინის იმპორტს, 2010 წელს ის 45 ათასი ტონით შემცირდა 2009 წლის მაჩვენეებლთან შედარებით. თუმცა აქვე უნდა აღინიშნოს, რომ 2010 წლის ბენზინის იმპორტის მაჩვენებელი 2008 წლის მაჩვენებელს დაახლოებით 3 ათასი ტონით აღემატება.
როგორც ნავთობპროდუქტების იმპორტიორთა კავშირში აღნიშნავენ, ჯამში ორივე პროდუქტის (ბენზინი და დიზელის საწვავი) იმპორტი 20 ათასი ტონით შემცირდა 2009 წელთან შედარებით, თუმცა 2008 წლის მაჩვენებელს ის 56 ათასი ტონით აღემატება.
ბენზინის იმპორტის შემცირების ძირითადი მიზეზი გახლავთ შემდეგი: რეალურად 2009 წელს ნავთობის მსოფლიო ფასი ძალზე დაბალი იყო, შესაბამისად დაბალი იყო საწვავის ფასებიც. 2009 წლის თითქმის მთელი 6 თვის განმავლობაში 1 ლიტრი ბენზინის ფასი შეადგენდა 95 თეთრიდან 1 ლარამდე, მაშინ როცა 2010 წელს ბენზინი 70-80 %-ით უფრო ძვირი იყო. შესაბამისად, გაზრდილი ფასის პირობებში მოხდა ბენზინის მოხმარების შემცირება. გარდა ამისა, ბევრი ბენზინზე მომუშავე სატრანსპორტო საშუალება გადავიდა ბუნებრივი აირის მოხმარებაზე მასზე მნიშვნელოვნად დაბალი ფასის გამო. აღსანიშნავია ასევე, რომ ბუნებრივ აირზე გადასვლა ტექნიკურად მხოლოდ ბენზინზე მომუშავე სატრანსპორტო საშუალებებს შეუძლიათ.
რაც შეეხება დიზელის საწვავს, მიუხედავად მაღალი ფასისა, მისი იმპორტი გაიზარდა, რაც განპირობებულია მისი მოხმარების ზრდით. კერძოდ, გაზრდილია სატრანზიტო გადაზიდვები, სასოფლო-სამეურნეო სამუშაოების მოცულობა; აქტიურად ხორციელდება ინფრასტრუქტურული პროექტები; დაწყებულია კრიზისის შემდგომი ეკონომიკის აღდგენის პროცესი. მნიშვნელოვანია ასევე ის, რომ მოსაზღვრე სახელმწიფოში - თურქეთში დიზელის საწვავი თითქმის ორჯერ ძვირია ჩვენთან შედარებით. შესაბამისად, აქეთ გადმოსული სატრანსპორტო საშუალებები მაქსიმალური ოდენობის საწვავით კვეთენ საზღვარს უკან.
2010 წელს კრიზისამდე პერიოდთან შედარებით (2008 წელი) როგორც ბენზინის, ასევე დიზელის საწვავის მეტი იმპორტი განხორციელდა.