რუსული დრონის დარტყმის შედეგად მარშალის კუნძულების დროშის ქვეშ მცურავი კომერციული გემი დაზიანდა. გემს რაფსის ზეთი გადაჰქონდა.
ამის შესახებ უკრაინული მედია ოდესის საოლქო სამხედრო ადმინისტრაციის ხელმძღვანელ ოლეჰ კიპერის განცხადებაზე დაყრდნობით იუწყება.
დარტყმის შედეგად გემის ზედნაშენში ხანძარი გაჩნდა. დაიღუპა ერთი ადამიანი, შვიდი კი დაშავდა.
„სამოქალაქო ნაოსნობასა და საპორტო ინფრასტრუქტურაზე მიზანმიმართული დარტყმებით რუსეთი უხეშად არღვევს საერთაშორისო სამართლის ნორმებს და საფრთხეს უქმნის გლობალურ სასურსათო უსაფრთხოებას“, - განაცხადა კიპერმა.
შეგახსენებთ, რომ 5 ოქტომბერს რუსეთმა ორი დრონით ნეიტრალურ წყლებში სამოქალაქო გემზე მიიტანა იერიში. გემს, რომელიც თურქეთს ეკუთვნოდა, მარცვლეული გადაჰქონდა. თავდასხმის შედეგად ერთი ადამიანი დაიღუპა, რამდენიმე კი დაშავდა.
