უკრაინელმა სამხედროებმა დონეცკის ოლქის ჩრდილოეთ ნაწილში, ლიმანის მახლობლად, დასახლებები ნოვე, რიდკოდუბი და კატერინივკა გაათავისუფლეს, ხოლო კარპივკასა და ნოვომიხაილივკაზე კონტროლი აღადგინეს. ამის შესახებ უკრაინის შეიარაღებული ძალების მესამე არმიის კორპუსი აცხადებს. იუწყება უკრაინული მედია.
მესამე არმიის კორპუსის მეთაურის, ანდრი ბილეცკის განცხადებით, აღნიშნული დასახლებების გათავისუფლება „ვივალდის“ ოპერაციის მესამე ეტაპის ფარგლებში მოხდა.
მისი თქმით, ნოვე ამ მიმართულებაზე რუსეთის არმიისთვის მნიშვნელოვანი ლოჯისტიკური და სამხედრო კვანძი იყო.
„ამ ეტაპის განმავლობაში მთლიანობაში უკრაინის 51 კვადრატული კილომეტრი ტერიტორია დავიბრუნეთ. ამ ეტაპს მთელი ოპერაციისთვის გარდამტეხი მნიშვნელობა ჰქონდა“, - განაცხადა ბილეცკიმ.
მესამე არმიის კორპუსის ინფორმაციით, ოპერაციის მესამე ეტაპზე რუსეთის ძალების დანაკარგმა 2 000 სამხედრო შეადგინა, ხოლო 250-ზე მეტი რუსი სამხედრო ტყვედ აიყვანეს.
უკრაინის მხარე აცხადებს, რომ „ვივალდის“ ოპერაცია ლიმანის მიმართულებაზე გრძელდება.
