ირანის პრეზიდენტმა მასუდ ფეზეშქიანმა განაცხადა, რომ თეირანს აშშ-სთან მოლაპარაკებების პროცესის მიმართ ნდობა აღარ აქვს. ამის შესახებ მან Al Jazeera-სთვის მიცემულ ინტერვიუში განაცხადა.
ფეზეშქიანის თქმით, ნდობის აღდგენამდე აშშ-სთან პირდაპირი მოლაპარაკებების გამართვა რთულია. მისი განცხადებით, ვაშინგტონი ყოველდღიურად აძლიერებს ირანის წინააღმდეგ სანქციებს, თეირანს ემუქრება და დარტყმებს ახორციელებს.
ირანის პრეზიდენტმა აღნიშნა, რომ თეირანს ეჭვი აქვს, რამდენად შეასრულებს აშშ მოლაპარაკებების შედეგად მიღწეულ შეთანხმებებს. CBS News-თან ინტერვიუში ფეზეშქიანმა ასევე განაცხადა, რომ ირანს სჭირდება ნდობის აღდგენა, რადგან, მისი თქმით, აშშ-ის მხრიდან მანამდე გაფორმებული შეთანხმებები არ შესრულებულა.
„ყოველდღე აძლიერებენ ჩვენს წინააღმდეგ სანქციებს, ყოველდღე გვემუქრებიან და ყოველდღე გვესხმიან თავს. თან არ ასრულებენ იმას, რასაც წერილობით აფორმებენ", - განაცხადა მან.
ამასთან, ირანის ხელისუფლება აშშ-სთან დიპლომატიური გზის გაგრძელების შესაძლებლობას კვლავ განიხილავს. ირანის საგარეო საქმეთა მინისტრმა აბას არაღჩიმ ვაშინგტონს შვიდდღიანი გეგმა შესთავაზა, რომლის მიხედვითაც, გარკვეული პირობების შესრულების შემთხვევაში, ირანი ჰორმუზის სრუტეს გახსნიდა და ბირთვულ პროგრამაზე მოლაპარაკებებს განაახლებდა.
თუმცა, he Wall Street Journal აშშ-ის ცნობით, აშშ-ის პრეზიდენტმა დონალდ ტრამპმა ირანის მიერ შეთავაზებული შვიდდღიანი ცეცხლის შეწყვეტის გეგმა უარყო და თანაშემწეებს განუცხადა, რომ ნოემბერში კონგრესის შუალედური არჩევნების შემდეგ ირანზე აშშ-ის დარტყმების განახლებას ელოდება.
