უკრაინის საგარეო საქმეთა მინისტრმა ანდრი სიბიჰამ საერთაშორისო საზოგადოებას მოუწოდა, რუსეთის მიერ კრივი რიჰში სავაჭრო ცენტრზე განხორციელებულ ორმაგ დარტყმას დაუყოვნებლივ უპასუხოს რუსეთის სამხედრო-სამრეწველო კომპლექსის წინააღმდეგ სანქციების გამკაცრებით და უკრაინისთვის დამატებითი საჰაერო თავდაცვის საშუალებების გადაცემით.
ამის შესახებ უკრაინის საგარეო საქმეთა მინისტრმა სოციალურ ქსელ X-ზე დაწერა.
„რუსეთმა განზრახ შეუტია კრივი რიჰში მდებარე ჩვეულებრივ სავაჭრო ცენტრს, შემდეგ კი განმეორებითი დარტყმა მიიტანა, როდესაც ადგილზე მაშველები მივიდნენ.
ასეთი ბარბაროსული განმეორებითი დარტყმები მიზნად ისახავს მშვიდობიან მოსახლეობაში მსხვერპლის რაოდენობის მაქსიმალურად გაზრდას. ეს ადასტურებს რუსეთის, როგორც ტერორისტული სახელმწიფოს, სტატუსს", - წერს სიბიჰა.
უკრაინის საგარეო საქმეთა მინისტრმა ხაზი გაუსვა, რომ ამ სისასტიკეზე პასუხისმგებელი რუსი სამხედრო დამნაშავეები აუცილებლად უნდა დაისაჯონ.
„მოვუწოდებთ მსოფლიოს, იმოქმედოს. თითოეულ ასეთ ომის დანაშაულს უნდა მოჰყვეს სანქციების გამკაცრება, განსაკუთრებით რუსეთის სამხედრო-სამრეწველო კომპლექსისა და მისი ხელშემწყობების წინააღმდეგ, ასევე უკრაინის სამხედრო მხარდაჭერის გაძლიერება“, - განაცხადა მინისტრმა.
მან დასძინა, რომ რუსეთს უნდა ჩამოერთვას როგორც ტერორის საშუალებების წარმოების, ისე მათი გამოყენების შესაძლებლობა.
„სანქციები და ჩამომგდები რაკეტები - ეს ორი ინსტრუმენტია, რომლებიც ადამიანების სიცოცხლეს გადაარჩენს. ორივე მათგანი დაუყოვნებლივ გვჭირდება“, - ხაზი გაუსვა სიბიჰამ.
21 აგვისტოს რუსებმა კრივი რიჰში მდებარე სავაჭრო ცენტრზე დრონებით ორჯერ მიიტანეს იერიში. თავდასხმების შედეგად 16 ადამიანი დაიღუპა, კიდევ 130 დაშავდა, მათ შორის 23 ბავშვია.
