17 აგვისტოს აზერბაიჯანის პრეზიდენტმა ილჰამ ალიევმა უკრაინის ყოფილ პრეზიდენტ ვიქტორ იუშჩენკოს ბაქოში უმასპინძლა.
შეხვედრის შესახებ ალიევი X-ზე წერს.
"ბაქოში ვიზიტით მყოფ უკრაინის ყოფილ პრეზიდენტ ვიქტორ იუშჩენკოს შევხვდი.
20 წელზე მეტი ხნის განმავლობაში ჩვენი ურთიერთობისა და მეგობრობის ბევრი კარგი მოგონება დაგვიგროვდა. შეხვედრაზე გავიხსენეთ აზერბაიჯანსა და უკრაინას შორის ურთიერთობების გაძლიერების მიზნით ერთობლივად გაწეული ძალისხმევა და ამ ურთიერთობების სამომავლო პერსპექტივებზე მოსაზრებები გავცვალეთ.
შეხვედრისას უკრაინის ელჩმა აზერბაიჯანში ირპენის საპატიო მოქალაქის წოდების დამადასტურებელი სერტიფიკატი გადმომცა", - წერს ალიევი.
შეხვედრას ესწრებოდა უკრაინის ელჩი იური ჰუსიევი, რომელმაც აზერბაიჯანის პრეზიდენტს „ქალაქ ირპინის საპატიო მოქალაქეობის“ სერტიფიკატი გადასცა.
„ეს არის ძლიერი პარტნიორობის, სოლიდარობის, მეგობრობისა და ირპინისთვის აზერბაიჯანის განუხრელი მხარდაჭერის აღიარება. გმადლობთ, ბატონო პრეზიდენტო და მადლობა აზერბაიჯანის ხალხს უკრაინის გვერდში დგომისთვის“, - დაწერა სოციალურ ქსელში ელჩმა.
