ოკუპირებული აფხაზეთის ე.წ. “საგარეო საქმეთა სამინისტრო” საქართველოს პროკურატურის მხრიდან გიორგი ბარამიძის მიერ გაკეთებულ განცხადებასთან დაკავშირებით გამოძიების დაწყებას ეხმაურება.
ე.წ. საგარეო უწყება აცხადებს, რომ აღნიშნული „სისხლის სამართლებრივი დევნა გაფრთხილება უნდა გახდეს ყველასთვის, ვინც მზად არის ღიად ისაუბროს საქართველოს შეიარაღებულ აგრესიაზე და მისი მსვლელობის დროს ჩადენილ დანაშაულებზე”.
"აფხაზეთის რესპუბლიკის საგარეო საქმეთა სამინისტრო საჭიროდ მიიჩნევს კომენტარი გააკეთოს საქართველოს ყოფილი ვიცე-პრემიერისა და სახელმწიფო მინისტრის, გიორგი ბარამიძის წინააღმდეგ სისხლის სამართლის საქმის აღძვრასთან დაკავშირებით, რაც უკავშირდება მის საჯარო განცხადებებს აფხაზი ხალხის წინააღმდეგ 1992–1993 წლებში საქართველოს შეიარაღებული აგრესიის მიმდინარეობისას ჩადენილ სამხედრო დანაშაულებებთან დაკავშირებით.
სისხლის სამართლის საქმის აღძვრის საფუძველი გახდა გიორგი ბარამიძის მიერ 1992–1993 წლების ქართულ-აფხაზური კონფლიქტის მოვლენების საჯარო განხილვისას გაკეთებული განცხადებები. იმ პერიოდში სამხედრო ტყვეების გაცვლის საკითხზე საუბრისას მან განაცხადა, რომ ქართულ მხარეს გაცვლის განხორციელება არ შეეძლო, ვინაიდან მას აფხაზი ტყვეები არ ჰყავდა. კერძოდ, მან თქვა: „ჩვენ არ გვყავდა აფხაზი ტყვეები, რადგან მათ ვხვრეტდით.“ ამ განცხადებების შემდეგ, საქართველოს ვეტერანთა საქმეების სახელმწიფო სამსახურის მიმართვის საფუძველზე, საქართველოს გენერალურმა პროკურატურამ დაიწყო გამოძიება სამშობლოს ღალატისა და საბოტაჟის მუხლებით.
ცხადია, რომ აღნიშნული სისხლისსამართლებრივი დევნა მიზნად ისახავს გაფრთხილებას ყველა იმ პირისთვის, ვინც მზად არის ღიად ისაუბროს საქართველოს შეიარაღებულ აგრესიასა და მის მიმდინარეობისას ჩადენილ დანაშაულებზე.
აფხაზეთის რესპუბლიკა მრავალი წლის განმავლობაში თანმიმდევრულად აცხადებს ამ დანაშაულების აღიარების, მათი ყოვლისმომცველი გამოძიებისა და მათთვის სათანადო საერთაშორისო-სამართლებრივი შეფასების აუცილებლობის შესახებ.
წარსულში მომხდარი მოვლენების კონსტრუქციული და პასუხისმგებლიანი გააზრების ნაცვლად, ქართული საზოგადოების ნაწილი კვლავაც უარყოფს ჩადენილ დანაშაულებს და მათ ცინიკურად ანაცვლებს პოლიტიზებული ინტერპრეტაციებით.
თუმცა ისტორიული ჭეშმარიტების სრულ დავიწყებას ვერავინ შეძლებს. დროთა განმავლობაში მოვლენების ობიექტური შეფასებები სულ უფრო მეტ დადასტურებას იღებს, მათ შორის ქართული საზოგადოების იმ ნაწილის მხრიდანაც, რომელიც მზადყოფნას ავლენს აღიაროს დაშვებული შეცდომები, მათ შორის ქართული პოლიტიკური ელიტის წარმომადგენლები.
საქართველოს გენერალური პროკურატურის გადაწყვეტილება გიორგი ბარამიძის წინააღმდეგ სისხლის სამართლის საქმის აღძვრის შესახებ, რომელიც მიღებულია იმ პირების ინიციატივით, რომლებსაც აფხაზური მხარე აფხაზეთის რესპუბლიკის წინააღმდეგ ომის გაჩაღებასა და აფხაზი ხალხის წინააღმდეგ არაერთი დანაშაულის ჩადენაში პასუხისმგებელ პირებად მიიჩნევს, აშკარად პოლიტიკურად მოტივირებულ ხასიათს ატარებს.
ეს გადაწყვეტილება წარმოადგენს მცდელობას, ზეწოლა მოახდინონ ქართული საზოგადოების იმ ნაწილზე, რომელიც ათწლეულების შემდეგაც მზადყოფნას ავლენს წარსულის ტრაგიკული მოვლენების ობიექტურად გააზრებისა და ჩადენილი დანაშაულების აღიარებისთვის.
ისტორიული ფაქტების საჯარო განხილვის შეზღუდვის მცდელობები ვერ შეცვლის ისტორიულ მეხსიერებასა და მომხდარი მოვლენების ობიექტურ შეფასებას.
მსგავსი ქმედებები მხოლოდ ცხადყოფს საქართველოს ცალკეული პოლიტიკური ძალების მოუმზადებლობას, ღიად და პასუხისმგებლობით გაიაზრონ 1992–1993 წლების მოვლენები", - აღნიშნულია განცხადებაში.
.
