პრინცი ჰარი და მეგან მარკლი (სასექსის ჰერცოგი და ჰერცოგინია) შვილებთან - პრინც არჩისა და პრინცესა ლილიბეტთან ერთად, ბრიტანეთის მეფე ჩარლზ III-სა და დედოფალ კამილას შეხვდნენ. ამის შესახებ ინფორმაციას, BBC-ზე დაყრდნობით, ბუკინგემის სასახლე ადასტურებს.
სამეფო ოჯახმა ჰარი და მეგანი პარასკევს, 10 ივლისს, გლოსტერშირის საგრაფოში მდებარე რეზიდენციაში, ჰაიგროუვ ჰაუსში მიიღო.
ეს ჩარლზ III-ისთვის ბოლო ოთხი წლის განმავლობაში. პირველი პირადი შეხვედრა იყო შვილიშვილებთან - შვიდი წლის არჩისა და ხუთი წლის ლილიბეტთან. ბუკინგემის სასახლეში შეხვედრას „კერძო ოჯახური ღონისძიება“ უწოდეს.
BBC-ის ცნობით, შეხვედრა სამეფო ოჯახში ურთიერთობების გაუმჯობესებისკენ გადადგმულ მნიშვნელოვან ნაბიჯად მიიჩნევა. ურთიერთობები მას შემდეგ დაიძაბა, რაც პრინცმა ჰარიმ და მეგან მარკლმა 2020 წელს სამეფო მოვალეობებზე უარი თქვეს და დიდი ბრიტანეთი დატოვეს.
სად იმყოფება ამჟამად სასექსების ოჯახი, საჯაროდ არ გახმაურებულა.
მედიის ცნობით, შეხვედრის სურვილი მამასაც და შვილსაც ჰქონდათ. წყაროების ინფორმაციით, მეფე ჩარლზ III ცდილობდა, ამ კვირაში დრო გამოენახა, რათა თავისი მცირეწლოვანი შვილიშვილებიც ენახა.
ამ კვირის განმავლობაში პრინცი ჰარი დიდ ბრიტანეთში რამდენიმე ოფიციალურ ღონისძიებას დაესწრო. პარასკევს ის ბირმინგემში იმყოფებოდა, სადაც მონაწილეობა მიიღო დაჭრილი სამხედროებისა და ვეტერანებისთვის გამართული Invictus Games-ის მომდევნო თამაშების მოსამზადებელ ღონისძიებებში.
პრინცი ჰარი და მეგან მარკლი 2022 წელს, დედოფალ ელისაბედ II-ის დაკრძალვის შემდეგ დიდ ბრიტანეთში ერთად აღარ ჩასულან. მოგვიანებით ჰარი ქვეყანაში რამდენჯერმე მარტო იმყოფებოდა. ერთ-ერთი ასეთი ვიზიტის დროს, გასული წლის სექტემბერში, ის მამასაც შეხვდა.
