რუსეთმა უკრაინის იერიშების შემდეგ დროებით შეაჩერა გემების მოძრაობა აზოვი-დონის საზღვაო არხში, რომელიც მდინარე დონს აზოვის ზღვასთან აკავშირებს.
ამის შესახებ Reuters რუსეთის მარცვლეულის საექსპორტო სექტორში ინფორმირებულ სამ წყაროზე დაყრდნობით წერს.
გამოცემის ცნობით, გადაწყვეტილება მას შემდეგ მიიღეს, რაც პარასკევს უკრაინამ აზოვის ზღვაში 13 რუსულ გემზე, მათ შორის 10 ტანკერზე, შეტევა განახორციელა.
ბაზრის ანალიტიკოსების შეფასებით, აზოვის ზღვის გავლით რუსეთის ხორბლის ექსპორტის დაახლოებით მეოთხედი ხორციელდება. რუსეთი კი მსოფლიოში ხორბლის უმსხვილესი ექსპორტიორია.
ერთ-ერთი წყაროს ინფორმაციით, რუსეთის სასაზღვრო სამსახურმა საზღვაო გადამზიდავ კომპანიებს აცნობა, რომ პარასკევს ადგილობრივი დროით 18:10 საათიდან ქერჩის სრუტეში, რომელიც აზოვისა და შავ ზღვებს აკავშირებს, გემების გასვლის შესახებ ყველა განაცხადის მიღება შეჩერებულია.
შეტყობინებაში არ არის მითითებული, როდის მოიხსნება აღნიშნული შეზღუდვა.
ვნობისათვის, პარასკევს Euronext-ის ბირჟაზე ხორბლის ფიუჩერსების ფასი 4%-ით გაიზარდა და ბოლო ექვსი კვირის მაქსიმუმს მიაღწია. ფასების ზრდა გამოიწვია ცნობებმა, რომ აზოვის ზღვაში გემების მოძრაობა შესაძლოა შეჩერებულიყო.
OSINT-ანალიტიკურმა პროექტმა "კიბერბოროშნომ" გამოაქვეყნა 10 ივლისის ღამით რუსეთის ნავთობინფრასტრუქტურაზე განხორციელებული დარტყმების ანალიზი. მათი შეფასებით, შეტევის შედეგად დაზიანდა რუსეთის ე.წ. „ჩრდილოვანი ფლოტის“ გემები, ასევე პორტები და ნავთობგადამამუშავებელი ქარხანა.
