Reuters-ის ცნობით, კრემლთან დაახლოებული სამი წყაროს განცხადებით, რუსეთის პრეზიდენტი ვლადიმირ პუტინი უარყოფს კიევთან სამშვიდობო მოლაპარაკებების დაწყების მოწოდებებს. უკრაინის მიერ რუსეთის ნავთობგადამამუშავებელ ქარხნებსა და პორტებზე დრონებით განხორციელებულმა თავდასხმებმა კი მისი გადაწყვეტილება გაამყარა, რომ ამ ეტაპზე ბრძოლა უნდა გაგრძელდეს.
ორი წყაროს თქმით, პუტინი, სავარაუდოდ, უკრაინაში კონფლიქტის ესკალაციის გზას აირჩევს და ომის ესკალაციას მოახდენს. ერთ-ერთმა მათგანმა, რომელიც რუსეთის პრეზიდენტს რეგულარულად ხვდება, აღნიშნა, რომ მომდევნო თვეებში ესკალაციის „მაღალი ალბათობა“ არსებობს.
ეს განცხადებები მას შემდეგ გაკეთდა, რაც აშშ-ის პრეზიდენტმა დონალდ ტრამპმა ორშაბათს განაცხადა, რომ ვლადიმირ პუტინს ომის დასრულება სურს და რომ კონფლიქტის მოგვარება „უფრო ახლოსაა, ვიდრე ბევრს ჰგონია“.
გასულ კვირას ტრამპმა სატელეფონო საუბრები გამართა როგორც პუტინთან, ისე უკრაინის პრეზიდენტ ვოლოდიმირ ზელენსკისთან. ოთხშაბათს კი ნატო-ს სამიტზე ზელენსკის პირადად შეხვდა. უკრაინის პრეზიდენტის თქმით, მათ „მშვიდობის დაახლოების გზებზე“ იმსჯელეს.
ერთ-ერთმა წყარომ განაცხადა, რომ რუსეთის პრეზიდენტი „თავის პოზიციაზე მტკიცედ დგას“ და მთავარ მიზნად კვლავ უკრაინის აღმოსავლეთში მდებარე დონბასის დარჩენილი ნაწილის სრულად დაკავებას მიიჩნევს, მიუხედავად იმისა, რომ რუსეთის წინსვლა წელს შენელდა.
ამავე წყაროს თქმით, პუტინმა ცოტა ხნის წინ მკაცრად გააკრიტიკა მრჩეველთა ჯგუფი, რომელმაც ცეცხლის შეწყვეტისა და არსებული ფრონტის ხაზის საფუძველზე კომპრომისის იდეა შესთავაზა.
მეორე წყაროს ინფორმაციით, პუტინი დარწმუნებულია, რომ რუსეთი უახლოეს პერიოდში დონბასს სრულად დაიკავებს.
