რუსეთი ცდილობს დაიბრუნოს პოლიტიკური გავლენა, მაგრამ მისი ომი „არასდროს უნდა იქცეს ნორმად“, - ამის შესახებ უკრაინის პრეზიდენტმა ვოლოდიმირ ზელენსკიმ ეუთო-ს საპარლამენტო ასამბლეის 33-ე ყოველწლიური სესიის მონაწილეებისთვის ვიდეომიმართვისას განაცხადა.
„რუსეთის ომი არასდროს, არასდროს უნდა იქცეს ნორმად. რუსეთი დიდ ძალისხმევას მიმართავს, რათა აღადგინოს თავისი პოლიტიკური კავშირები და დაიბრუნოს პოლიტიკური გავლენა,“ - განაცხადა ზელენსკიმ.
მისი თქმით, რუსეთი მედიის საშუალებით ზეწოლას ახორციელებს და ცდილობს იმ ევროპული ხმების დესტაბილიზაციას, რომლებიც ამ ომზე გულწრფელად საუბრობენ და უფრო ძლიერი ევროპის შექმნას უჭერენ მხარს.
ზელენსკიმ აღნიშნა, რომ უკრაინა, თავის მხრივ, ყველაფერს აკეთებს უკრაინის, მთელი ევროპისა და ევროპული ცხოვრების წესის დასაცავად.
„გთხოვთ, დარჩით აქტიურები. გთხოვთ, დაგვეხმარეთ ჩვენი ხალხის რუსეთის ტყვეობიდან დაბრუნებაში - ჩვენი ბავშვების, სამხედრო ტყვეების, სამოქალაქო მძევლების, მათ შორის ეუთო-ს სამი წარმომადგენლის,“ - განაცხადა მან სესიის მონაწილეებისადმი მიმართვისას.
