სომხეთში ჩატარებულმა არჩევნებმა კიდევ ერთხელ აჩვენა სომხეთის დემოკრატიის სიძლიერე. „ხავერდოვანი რევოლუციის“ სული, რომელსაც 2018 წელს ნიკოლ ფაშინიანი ხელმძღვანელობდა, ცოცხალია და ვითარდება. ამის შესახებ სომხეთის პრემიერ-მინისტრ ნიკოლ ფაშინიანთან ერთობლივ პრესკონფერენციაზე ევროკომისიის პრეზიდენტმა ურსულა ფონ დერ ლაიენმა განაცხადა.

„სომხეთი აგრძელებს გზას დემოკრატიის, რეფორმების, მშვიდობისა და ევროკავშირთან უფრო მჭიდრო თანამშრომლობისკენ. 7 ივნისს სომეხმა ხალხმა მკაფიოდ გამოხატა თავისი არჩევანი - აირჩია დემოკრატია, კანონის უზენაესობა, რეფორმები და მშვიდობა, აირჩია ღია და ინკლუზიური პარტნიორობა ევროკავშირთან. ახლა ჩვენ ეს მისწრაფებები რეალურ შედეგებად უნდა ვაქციოთ,“ - განაცხადა ევროკომისიის პრეზიდენტმა.

ევროკომისიის პრეზიდენტის განცხადებით, სომხეთი რუსეთის მხრიდან ეკონომიკურ ზეწოლას განიცდის.

„შეგიძლიათ, ჩვენი იმედი გქონდეთ. მალე სომხეთი ვაჭრობის დივერსიფიკაციისთვის 18 მილიონ ევროს მიიღებს. ასევე, ჩვენ ავტონომიური სავაჭრო ზომების შესახებ წინადადებას წარვადგენთ. ეს ევროკავშირში სომხეთიდან ექსპორტის 80%-ს ლიბერალიზაციას მოიცავს. ეს ნიშნავს, რომ ამიერიდან ევროკავშირთან სომხეთის ვაჭრობის 80% ტარიფებისგან თავისუფალი იქნება. აღნიშნული ზომების შედეგად სომხეთიდან ხილისა და ბოსტნეულის 99%-ისთვის ევროპის კარი გაიღება“, - განაცხადა ურსულა ფონ დერ ლაიენმა.

ურსულა ფონ დერ ლაიენი სომხეთის დედაქალაქში დღეს ჩავიდა.