კრემლის ლიდერის, ვლადიმირ პუტინის მიერ უკრაინის წინააღმდეგ დაწყებული ომი ყირიმში თავად რუსეთის წინააღმდეგ ბრუნდება. ანექსირებულ ნახევარკუნძულზე დარტყმების გახშირების ფონზე, უკრაინული დრონებისა და რაკეტების იერიშები არღვევს რუსეთის ლოგისტიკასა და ყირიმის მომარაგების ხაზებს, რის გამოც რეგიონი კრიზისში ეშვება და ადგილობრივი ხელისუფლება საგანგებო ზომებს მიმართავს. ამის შესახებ Bloomberg წერს.
ელექტროენერგიის გათიშვების გამო ათასობით მცხოვრები წყალმომარაგების გარეშე დარჩა, ხოლო ბევრი რუსი ჩივის, რომ ბენზინგასამართ სადგურებზე საწვავის გაყიდვის აკრძალვის გამო ნახევარკუნძულის დატოვებაც კი არ შეუძლია.
Bloomberg-ის ინფორმაციით, მიმდინარე კვირაში ენერგოსისტემაზე განხორციელებული დარტყმების შემდეგ პრობლემებს ვერც სევასტოპოლი გადაურჩა - მწყობრიდან გამოვიდა წყალმომარაგების სატუმბი სადგურები, რის გამოც ადგილობრივმა კომუნალურმა სამსახურმა მოსახლეობის წყლით უზრუნველსაყოფად მობილური ცისტერნები გამოიყვანა.
ყირიმში რუსეთის მიერ შექმნილი მდგომარეობის გაუარესება, გამოცემის შეფასებით, უკრაინის პოზიციების ბოლოდროინდელ გამყარებაზე მიუთითებს.
„ყირიმში საწვავის, სამხედრო ლოგისტიკისა და მართვის კრიზისი პრაქტიკულად ყოველდღიურად ღრმავდება. რუსეთის საოკუპაციო ადმინისტრაცია სრულიად მკაფიოდ აღიარებს, რომ ვერ უმკლავდება იმ პრობლემებს, რომლებიც ჩვენმა საშუალო მოქმედების რადიუსის იარაღმა შექმნა,“ -დაწერა უკრაინის პრეზიდენტმა ვოლოდიმირ ზელენსკიმ.
ვიდრე რუსეთის ძალები ფრონტზე მძიმე დანაკარგებს განიცდიან, უკრაინა სულ უფრო ეფექტიანად ახორციელებს დრონებითა და რაკეტებით დარტყმებს რუსეთის ტერიტორიაზე, აზიანებს ნავთობგადამამუშავებელ ქარხნებსა და სხვა მნიშვნელოვან ინფრასტრუქტურას, მათ შორის მოსკოვშიც.
გამოცემის შეფასებით, ეს საწვავის მიწოდების შეფერხებებს აძლიერებს და ზრდის ეკონომიკურ ზეწოლას ომის დაფინანსებაზე, რომელიც უკვე მეხუთე წელია გრძელდება და დასრულების ნიშნები ჯერ არ ჩანს.
