ფილიპინების ცენტრალურ ნაწილში, ქალაქ ტაკლობანის ერთ-ერთ საჯარო სკოლაში ორმა შეიარაღებულმა მოსწავლემ ცეცხლი გახსნა, რის შედეგადაც სამი მოსწავლე დაიღუპა და სულ მცირე 20 ადამიანი დაიჭრა.

ინფორმაციას Associated Press პოლიციაზე დაყრდნობით ავრცელებს.

თავდასხმა მოხდა სან-ხოსეს ეროვნულ სკოლაში ორშაბათს, სადაც 1500-ზე მეტი მოსწავლე სწავლობს.

პოლიციის ინფორმაციით, ეჭვმიტანილები, 14 და 15 წლის მოზარდები, დააკავეს. ისინი ამავე სასწავლო დაწესებულების მოსწავლეები იყვნენ.

რეგიონული პოლიციის უფროსმა ჯეისონ კაპოიმ განაცხადა, რომ დაზარალებულებიდან 20 ადამიანიდან 15 ცეცხლნასროლი ჭრილობებით დაშავდა. დანარჩენები კი გაქცევის დროს.

სამართალდამცველის თქმით, თავდამსხმელები ორ საკლასო ითახში შეიჭრნენ.

„შეიარაღებული პირები ორ ოთახში შევიდნენ, რადგან პირველ ოთახში სროლის შემდეგ ბავშვები გაიფანტნენ, ხოლო ეჭვმიტანილები, როგორც ჩანს, რამდენიმე მსხვერპლს მეორე ოთახშიც გაეკიდნენ“, - განაცხადა კაპოიმ.

დაკავებულთა პირველადი დაკითხვისას მათ განაცხადეს, რომ სკოლაში ბულინგის მსხვერპლები იყვნენ. ამჟამად პოლიცია ამ ინფორმაციას ამოწმებს და თავდასხმის მოტივებს ადგენს.

გამოძიების მონაცემებით, ერთ-ერთმა ეჭვმიტანილმა გამოიყენა 9 მმ კალიბრის პისტოლეტი, რომელიც პოლიციელ დეიდას მოპარა. მეორე ეჭვმიტანილი კი შეიარაღებული იყო .38 კალიბრის რევოლვერით.

ფერდინანდ მარკოს უმცროსმა ბრძანა ტრაგედიის სრულფასოვანი გამოძიება და სკოლებში, სამუშაო ადგილებსა და საზოგადოებრივ სივრცეებში უსაფრთხოების ზომების გამკაცრება.

პოლიციის განცხადებით, გამოძიების დასრულების შემდეგ არასრულწლოვნებს სოციალური სამსახურს გადასცემენ.