ნატო-ს აღმოსავლეთ ფლანგის დაცვის მიზნით, ლიეტუვაში თითქმის 5 000 გერმანელი სამხედრო მოსამსახურის მუდმივი განთავსება იგეგმება. როგორც Bild წერს, ეს იქნება პირველი შემთხვევა, როდესაც ბუნდესვერი თავისი ისტორიის განმავლობაში საზღვარგარეთ მუდმივ საფუძველზე ასეთ მსხვილ სამხედრო კონტინგენტს განათავსებს.
ლიეტუვის თავდაცვის მინისტრის, რობერტას კაუნასის განცხადებით, გერმანული ბრიგადის ფორმირება გეგმის მიხედვით მიმდინარეობს და ინფრასტრუქტურის შექმნის კუთხით სამუშაოები გრაფიკსაც კი უსწრებს.
„გერმანული ბრიგადის ფორმირება გეგმის მიხედვით მიმდინარეობს. ფორმირების პირველი ეტაპის მხრივ გრაფიკს ათი თვითაც კი ვუსწრებთ. ეს ნიშნავს, რომ ინფრასტრუქტურის შექმნაში მნიშვნელოვან პროგრესს მივაღწიეთ და მეორე ეტაპზე გადასვლას უფრო ადრე შევძლებთ“, - განაცხადა ლიეტუვის თავდაცვის მინისტრმა რობერტას კაუნასმა გერმანიის თავდაცვის მინისტრ ბორის პისტორიუსის ვიზიტის წინ.
ამჟამად ლიეტუვაში დაახლოებით 1 800 გერმანელი სამხედრო იმყოფება. ისინი ბელარუსის საზღვრიდან დაახლოებით 20 კილომეტრში მდებარე პაბრადეს პოლიგონზე "თავისუფლების ფარის" ფარგლებში წვრთნებს ატარებენ.
გეგმის თანახმად, 2027 წლის ბოლომდე ლიეტუვაში მუდმივად განთავსდება დაახლოებით 5 000 გერმანელი სამხედრო. ახალი გერმანული ბრიგადა განლაგდება ქალაქ რუდნინკაში, სადაც სამხედროების ნაწილი ოჯახებით ერთად იცხოვრებს.
ლიეტუვის თავდაცვის მინისტრის თქმით, ბრიგადას უდიდესი მნიშვნელობა ექნება ნატო-ს აღმოსავლეთ ფლანგზე შეკავების პოლიტიკისა და როგორც ლიეტუვის, ისე მთლიანად ალიანსის უსაფრთხოებისთვის.
