უკრაინის თავდაცვის მინისტრმა მიხაილო ფედოროვმა განაცხადა, რომ დღეს მოსკოვში მომხდარი მოვლენები მიუთითებს იმაზე, რომ უკრაინა სწორ გზაზე მიდის და ძლიერდება.
„დღეს საერთოდ სიმბოლური დღეა. ის მოვლენები, რომლებიც დღეს მოსკოვში ხდება, ზუსტად მიუთითებს იმაზე, რომ უკრაინა სწორ გზაზე მიდის და ძლიერდება“, - თქვა მან „რამშტაინის“ ფორმატის უკრაინის თავდაცვის საკონტაქტო ჯგუფის 35-ე შეხვედრის შემდეგ გამართულ პრესკონფერენციაზე.
ფედოროვის თქმით, დღევანდელი შეხვედრა „რამშტაინი“ გაიმართა სლოგანით „შესაძლებლობების ფანჯარა“.
„ბოლო თვეების განმავლობაში ჩვენ ჩვენი საშინაო დავალება შევასრულეთ. ჩვენ მივაღწიეთ შედეგებს ომის ბევრ სფეროში. დღეს ბევრი პარტნიორი საუბრობდა იმაზე, რომ ისინი ხედავენ ამ „შესაძლებლობების ფანჯარას“. და ისინი მზად არიან გააგრძელონ უკრაინის დახმარება“, - განაცხადა მინისტრმა.
როგორც ცნობილია, 18 ივნისის ღამეს უკრაინის შეიარაღებულმა ძალებმა დარტყმები განახორციელეს რუსეთის ტერიტორიაზე არსებულ რიგ ობიექტებზე, მათ შორის მოსკოვის ნავთობგადამამუშავებელ ქარხანაზე კაპოტნიას რაიონში. უკრაინის შეიარაღებული ძალების გენერალურმა შტაბმა ოფიციალურად დაადასტურა მოსკოვის ნავთობგადამამუშავებელი ქარხნის, ასევე სხვა სამხედრო და ლოჯისტიკური ობიექტების დაზიანება.
ეს უკვე მეორე დარტყმაა მოსკოვის ნავთობგადამამუშავებელ ქარხანაზე უკრაინული ძალების მიერ ერთი კვირის განმავლობაში. მანამდე შეიარაღებულმა ძალებმა ამ ობიექტზე დარტყმა 16 ივნისს განახორციელეს.
