შვედეთი 108 მილიონ დოლარს გამოყოფს PURL-ის ინიციატივის მხარდასაჭერად, რომლის ფარგლებში უკრაინის პარტნიორები უკრაინისთვის ამერიკული წარმოების შეიარაღებას შეიძენენ.
ამის შესახებ შვედეთის თავდაცვის სამინისტროში განაცხადეს.
უწყების განმარტებით, აღნიშნული თანხა უკრაინისთვის ადრე გამოცხადებული სამხედრო დახმარების პაკეტის ნაწილია.
შვედეთის თავდაცვის მინისტრმა, პოლ იონსონმა აღნიშნა, რომ PURL-ის მეშვეობით უკრაინა სწრაფად მიიღებს წვდომას იმ ამერიკულ თავდაცვით აღჭურვილობაზე, რომელიც მისთვის ყველაზე პრიორიტეტულია, მათ შორის თანამედროვე საჰაერო თავდაცვის სისტემებსა და საბრძოლო მასალებზე.
„ეს გადამწყვეტი მნიშვნელობისაა იმისთვის, რომ უკრაინამ რუსეთის შემდგომი თავდასხმებისგან თავის დაცვა შეძლოს. შვედეთის მხარდაჭერა გრძელვადიანი, ყოვლისმომცველი და უკრაინის საჭიროებებზე დაფუძნებულია“, - განაცხადა იონსონმა.
