აშშ-ის მისურის შტატში თვითმფრინავის ჩამოვარდნის შედეგად 11 პარაშუტისტი და ერთი პილოტი დაიღუპა, აცხადებენ ოფიციალური პირები. ამის შესახებ BBC წერს.
საგანგებო სიტუაციების მართვის სამსახურის წარმომადგენლის ინფორმაციით, აფრენის შემდეგ თვითმფრინავმა საჭირო სიმაღლის აკრეფა ვერ შეძლო, მკვეთრად მარცხნივ გადაუხვია და აეროპორტიდან დაახლოებით 183 მეტრის დაშორებით ჩამოვარდა. ბორტზე მყოფი 12-ვე ადამიანი დაიღუპა.
„ამ შემთხვევას მასობრივი მსხვერპლის ინციდენტად განვიხილავთ“, - განაცხადა ბეიტსის ოლქის შერიფმა, ჩედ ანდერსონმა პრესკონფერენციაზე.
აშშ-ის ფედერალური საავიაციო ადმინისტრაციის (FAA) ინფორმაციით, ავიაკატასტროფა განიცადა Pacific Aerospace P750-ის ტიპის ერთძრავიანმა თვითმფრინავმა.
ადგილობრივი მედიის ცნობით, მაშველები ამოწმებენ ტერიტორიას, რათა დაადგინონ, ხომ არ მოახერხა რომელიმე პარაშუტისტმა თვითმფრინავიდან გადმოხტომა ჩამოვარდნამდე.
როგორც BBC წერს, ავიაკატასტროფის მიზეზის დასადგენად გამოძიება მიმდინარეობს.
