რუსეთის მიერ 5 ივნისს დილით განხორციელებული დრონებით შეტევის შედეგად, კიევის ოლქის ბროვარის რაიონში მდებარე კვების მრეწველობის საწარმოზე - “იაგოტინსკი ბავშვებისთვის”, დარტყმას 4 ადამიანი ემსხვერპლა, 7 კი დაშავდა.
ინფორმაციას კიევის საოლქო სამხედრო ადმინისტრაციის ხელმძღვანელი მიკოლა კალაშნიკი ავრცელებს.
მისი თქმით, რუსულმა ძალებმა იერიში მიიტანეს სამოქალაქო დანიშნულების საწარმოზე, სადაც ადამიანები სამუშაო პროცესში იმყოფებოდნენ.
თავდაპირველად გავრცელებული ცნობებით, შეტევის შედეგად ერთი ადამიანი დაიღუპა და ოთხი დაშავდა, თუმცა მოგვიანებით მაშველებმა და პოლიციამ დააზუსტეს, რომ მსხვერპლის რაოდენობა 4-მდე გაიზარდა, დაშავებულთა რიცხვი კი 7-ს შეადგენს.
ადგილზე სამაშველო და საგამოძიებო სამუშაოები მიმდინარეობს.
