მოხარული ვარ, რომ პრეზიდენტმა ტრამპმა საკუთარ ადმინისტრაციაში სხვადასხვა ქვეყანასთან არსებული, რიგ შემთხვევაში, წლების განმავლობაში გაყინული ურთერთობების გადახედვის შესაძლებლობა მოგვცა. მიმაჩნია, რომ ამაში ფასეული შესაძლებლობებია და ვფიქრობ, საქართველო სწორედ ამ ქვეყნების რიგშია, – ამის შესახებ ამერიკის შეერთებული შტატების სახელმწიფო მდივნის მოადგილემ კრისტოფერ ლანდაუმ განაცხადა აშშ-ში საქართველოს საელჩოს მიერ ორგანიზებულ ღონისძიებაზე, რომელიც საქართველოს დამოუკიდებლობის დღეს მიეძღვნა.
მისივე თქმით, წინა კვირას თბილისში ამერიკული დელეგაცია იმყოფებოდა და დადებითი განწყობით ელოდება, რომ საქართველოს ხელისუფლებასთან მუშაობა გაგრძელდება.
„როგორც მინისტრის მოადგილემ კარგად აღნიშნა, საქართველოს, ასევე, აშშ-ს სურს, ეროვნულ ინტერესებზე დამყარებული საგარეო პოლიტიკა აწარმოონ. ვფიქრობ, ბევრი საერთო ეროვნული ინტერესი გვაქვს. საქართველოს კავკასიის რეგიონში წარმოუდგენლად სტრატეგიული გეოგრაფიული მდებარეობა აქვს, განსაკუთრებით უკანასკნელ პერიოდში სომხეთსა და აზერბაიჯანს შორის მიღწეული სამშვიდობო შეთანხმების ფონზე. ვფიქრობ, რეგიონული ინტეგრაციის თვალსაზრისით, ამან ახალი ეკონომიკური შესაძლებლობები შექმნა. მე ცენტრალურ აზიაშიც ვიმყოფებოდი. ვფიქრობ, იქ ბევრი შესაძლებლობაა, ინდოეთიდან ცენტრალურ აზიამდე გადებული სავაჭრო მარშრუტის გათვალისწინებით, რომელიც კავკასიაზე გადის და შავი ზღვით ევროპას უკავშირდება. ამიტომ, ძალიან მოხარული ვარ, რომ პრეზიდენტმა ტრამპმა საკუთარ ადმინისტრაციაში სხვადასხვა ქვეყანასთან არსებული, რიგ შემთხვევაში, წლების განმავლობაში გაყინული, ურთერთობების გადახედვის შესაძლებლობა მოგვცა. მიმაჩნია, რომ ამაში ფასეული შესაძლებლობებია და, ვფიქრობ, საქართველო სწორედ ამ ქვეყანების რიგშია.
ვიცი, რომ წინა კვირას თბილისში ჩვენი დელეგაცია გავგზავნეთ და დადებითი განწყობით ველოდები, რომ თქვენს ხელისუფლებასთან მუშაობა გაგრძელდება, რათა შევძლოთ ჩვენს შორის კიდევ უფრო მეტი საერთოს გამონახვა, იქნება ეს ეკონომიკის, უსაფრთხოებისა, თუ პოლიტიკის მიმართულებით. შევეცადოთ, სწორედ ამ მიმართულებით ვიმუშაოთ, რადგან, ვფიქრობ, ჩვენს ორ ქვეყანას მართლაც ბევრი საერთო ინტერესი აქვს. განვმეორდები, ვიმედოვნებ, დღეს ჩემი აქ ყოფნა აღიქმება ძლიერ გზავნილად, რომ ჩვენ გულწრფელად დაინტერესებული ვართ ორმხრივი ურთიერთობების გაუმჯობესებით, რადგან მიგვაჩნია, რომ ეს ორივე ქვეყნის ინტერესშია“, – აღნიშნა კრისტოფერ ლანდაუმ.
საქართველოს დამოუკიდებლობის დღისადმი მიძღვნილ ღონისძიებას ესწრებოდნენ აშშ-ში საქართველოს ელჩი თამარ ტალიაშვილი და საგარეო საქმეთა მინისტრის პირველი მოადგილე გიორგი ზურაბაშვილი.
