კრემლში აცხადებენ, რომ 19-21 მაისს მიმდინარე რუსეთისა და ბელარუსის ერთობლივი ბირთვული წვრთნები ევროპის და NATO-სთვის სიგნალია. რ შესაბამისი განცხადება კრემლის პრესსპიკერმა, დმიტრი პესკოვმა გააკეთა.
ჟურნალისტის შეკითხვაზე, წარმოადგენს თუ არა ერთობლივი ბირთვული სწავლებები გზავნილს ევროპისა და NATO-სთვის, პესკოვმა დადებითად უპასუხა.
„ნებისმიერი სწავლება სამხედრო მშენებლობის ნაწილია და ნებისმიერი წვრთნა სიგნალია“, - განაცხადა კრემლის წარმომადგენელმა.
19 მაისს რუსეთმა განაცხადა, რომ „აგრესიის საფრთხის პირობებში“ ბირთვულ სწავლებებს იწყებს. რუსეთის თავდაცვის სამინისტროს ცნობით, სწავლებებში 64 ათასზე მეტი სამხედრო და დაახლოებით 7 800 ერთეული ტექნიკა მონაწილეობს. მანევრებში ჩართულია სტრატეგიული დანიშნულების სარაკეტო ძალები, ასევე წყნარი ოკეანისა და ჩრდილოეთის ფლოტები.
ამასთან, ბელარუსშიც გამოცხადდა სამხედრო სწავლებების დაწყება. ქვეყნის თავდაცვის სამინისტროში განმარტეს, რომ სწავლების მიზანია პირადი შემადგენლობის მომზადების დონის გაუმჯობესება, შეიარაღებისა და სამხედრო ტექნიკის მზადყოფნის შემოწმება, ასევე არაგეგმური რაიონებიდან საბრძოლო ამოცანების შესრულების ორგანიზება.
