გარემოს დაცვისა და სოფლის მეურნეობის მინისტრის მოადგილე ლაშა დოლიძე, გაეროს სურსათისა და სოფლის მეურნეობის ორგანიზაციის (FAO) ევროპისა და ცენტრალური აზიის 35-ე რეგიონული კონფერენციის ფარგლებში, თურქეთის რესპუბლიკის სოფლის მეურნეობისა და სატყეო მეურნეობის მინისტრის მოადგილეს აჰმედ ბაგჩის და თურქეთის რესპუბლიკის სურსათის, სოფლის მეურნეობისა და მეცხოველეობის ყოფილ მინისტრს, FAO-ს გენერალური დირექტორობის კანდიდატს, მეჰმეთ მედი ექერს შეხვდა.
შეხვედრის ფარგლებში მხარეებმა საქართველო-თურქეთს შორის აგროსასურსათო სექტორში არსებული თანამშრომლობის მიმართულებები და სამომავლო პერსპექტივები განიხილეს. განსაკუთრებული ყურადღება დაეთმო ირიგაციისა და დრენაჟის სისტემების მართვას, წყლის რესურსების ეფექტიან გამოყენებასა და თანამედროვე სარწყავი ტექნოლოგიების დანერგვის მიმართულებით თანამშრომლობის გაღრმავებას.
მხარეებმა აღნიშნეს, რომ კლიმატის ცვლილების პირობებში წყლის რესურსების მდგრადი მართვა და თანამედროვე აგროტექნოლოგიების გამოყენება სოფლის მეურნეობის სექტორის განვითარების ერთ-ერთი მნიშვნელოვანი წინაპირობაა. ამ კონტექსტში ყურადღება გამახვილდა გამოცდილებისა და პრაქტიკული ცოდნის გაზიარების მნიშვნელობაზე, რაც ხელს შეუწყობს სექტორში ეფექტიანი და ინოვაციური მიდგომების დანერგვას.
შეხვედრაზე საუბარი ასევე შეეხო საქართველოს აგროსასურსათო პროდუქციის თურქეთის ბაზარზე საექსპორტო პოტენციალს. აღინიშნა, რომ ორ ქვეყანას შორის სავაჭრო-ეკონომიკური ურთიერთობების გაღრმავება და სექტორული თანამშრომლობის გაფართოება მნიშვნელოვან შესაძლებლობებს ქმნის როგორც ქართული პროდუქციის ექსპორტის ზრდისთვის, ისე რეგიონული ეკონომიკური თანამშრომლობის გაძლიერებისთვის.
ლაშა დოლიძემ ყურადღება გაამახვილა საქართველოში სოფლის მეურნეობის სექტორში მიმდინარე რეფორმებზე, საერთაშორისო სტანდარტების დანერგვასა და მდგრადი აგროსასურსათო სისტემების განვითარების მნიშვნელობაზე. მისივე თქმით, საერთაშორისო პარტნიორებთან თანამშრომლობა სამინისტროს ერთ-ერთ პრიორიტეტულ მიმართულებას წარმოადგენს და მნიშვნელოვან როლს ასრულებს სექტორის კონკურენტუნარიანობის ზრდაში.
მხარეებმა კიდევ ერთხელ დაადასტურეს მზადყოფნა, აქტიურად გაგრძელდეს თანამშრომლობა როგორც ორმხრივ, ისე საერთაშორისო ფორმატებში, რაც ხელს შეუწყობს რეგიონში სოფლის მეურნეობის, სასურსათო უსაფრთხოებისა და მდგრადი განვითარების მიმართულებით ერთობლივი ინიციატივების განხორციელებას.
