უკრაინის პრეზიდენტმა ვოლოდიმირ ზელენსკიმ განაცხადა, რომ 25 აპრილის ღამეს რუსეთის იერიშის შედეგად მთელ უკრაინაში 4 ადამიანი დაიღუპა, ხოლო 30-ზე მეტი დაშავდა.
მისი ინფორმაციით, დნიპროს გარდა, დაშავებულები არიან ასევე ჩერნიგოვის, ოდესისა და ხარკოვის ოლქებში.
„რუსების ტაქტიკა არ შეცვლილა: იყენებენ დამრტყმელ დრონებს, ფრთოსან რაკეტებს და ბალისტიკური იარაღის მნიშვნელოვან რაოდენობას. მიზნების უმეტესობა ქალაქების ჩვეულებრივი ინფრასტრუქტურაა. დაზიანებულია საცხოვრებელი სახლები, ენერგეტიკული ობიექტები და საწარმოები.
ყოველი ასეთი თავდასხმა უნდა ახსენებდეს ჩვენს პარტნიორებს, რომ ვითარება მოითხოვს დაუყოვნებლივ და მკაცრ ნაბიჯებს, ჩვენი საჰაერო თავდაცვის ოპერატიულ გაძლიერებას,“ - წერს ზელენსკი.
უკრაინის პრეზიდენტმა ასევე აღნიშნა, რომ საჭიროა რუსეთის წინააღმდეგ ევროკავშირის სანქციების 21-ე პაკეტზე მუშაობის გაგრძელება.
უკრაინის საჰაერო ძალების ინფორმციით,.25 აპრილის ღამეს მტერმა კომბინირებული იერიში განახორციელა 666 უპილოტო საფრენი აპარატისა და რაკეტის გამოყენებით, საიდანაც 610 ჩამოაგდეს ან ჩაახშეს.
