ევროკომისიამ დაუყოვნებლივ დაიწყო მოლაპარაკებები უნგრეთის ახალარჩეულ პრემიერ-მინისტრ პეტერ მადიართან და მოუწოდა მას გააუმჯობესოს ურთიერთობები უკრაინასთან და დაიწყოს დიდი ხნის განმავლობაში მოსალოდნელი რეფორმები, რათა განიბლოკოს ევროკავშირის მიერ გაყინული 35 მილიარდი ევრო. ინფორმაციას Financial Times ავრცელებს.
როგორც მედია წერს, უნგრეთისთვის განკუთვნილი ევროკავშირის დაახლოებით 35 მილიარდი ევრო გაყინულია ბრიუსელთან მთელი რიგი დავებისა და ვიქტორ ორბანის მიერ საჭირო რეფორმების გატარებაზე უარის გამო და როგორც წყარო ამბობს, თუ მადიარი მისთვის წაყენებულ 27 პირობას შეასრულებს, მაშინ ევროკავშირში ამ თანხას განბლოკავენ.
ევროკავშირის ოფიციალური პირები, რომლებიც ინფორმირებულნი არიან ბრიუსელსა და ბუდაპეშტს შორის პირველ მოლაპარაკებებზე, აცხადებენ, რომ მადიარის მიერ კონსტიტუციური უმრავლესობის მიღწევამ მათი მოლოდინებიც კი გადააჭარბა. თუმცა ამან ასევე გაზარდა ევროკომისიის მოლოდინები მისი პოლიტიკის მიმართ.
„მას [მადიარს] აქვს სრულფასოვანი მანდატი ცვლილებებისთვის… და ჩვენ მასთან პირველივე დღიდან ვთანამშრომლობთ. განწყობა ასეთია: მოდით, მასზე ფსონი გავაორმაგოთ. თუ ისინი შეასრულებენ დაპირებებს, ჩვენც შევასრულებთ ჩვენსას,“ — განაცხადა ევროკავშირის მაღალჩინოსანმა.
ევროკავშირის ორი დიპლომატი სხვა წევრი ქვეყნებიდან აღნიშნავს, რომ დედაქალაქები მიიჩნევენ, რომ მადიარის მიერ უკრაინისთვის 90 მილიარდი ევროს სესხის გახსნა და ბუდაპეშტის ვეტოს მოხსნა რუსეთის წინააღმდეგ სანქციების შემდეგ რაუნდზე არის მთავარი სიგნალები ახალი პრემიერის სურვილის შესახებ ევროკავშირთან ურთიერთობების აღდგენისკენ.
ევროკომისია ასევე ელოდება მადიართან და მის გუნდთან მოლაპარაკებების მალე დაწყებას უთანხმოების მოსაგვარებლად უნგრეთის ლტოლვილთა საკითხებზე ევროპული სასამართლოს გადაწყვეტილების შეუსრულებლობის გამო. ამ დავის გამო უნგრეთს ყოველდღიურად ერთი მილიონი ევროს ჯარიმა ეკისრება, გადასახდელი თანხა კი ამ დროისთვის 900 მილიონ ევროს შეადგენს.
პეტერ მადიარმა განაცხადა, რომ მისი პირველი ვიზიტი იქნება ვარშავასა და ვენაში. თუმცა მიანიშნა, რომ შესაძლოა პრემიერ-მინისტრის თანამდებობის ოფიციალურ ინაუგურაციამდე ეწვიოს ბრიუსულსაც, რათა განიხილოს ევროკავშირის გაყინული თანხების საკითხი.
