აშშ-ის პრეზიდენტმა დონალდ ტრამპმა კომენტარი გააკეთა იმის შესახებ, რომ ირანში ელექტროსადგურებსა და სხვა კრიტიკულ ინფრასტრუქტურაზე აშშ-ის პოტენციური დარტყმები, ომის დანაშაულად ჩაითვლება. ამის შესახებ CNN იუწყება.
თეთრ სახლში სააღდგომო ღონისძიების დროს რეპორტიორებმა ტრამპს ჰკითხეს, შეიძლება თუ არა ირანში სამოქალაქო ინფრასტრუქტურაზე აშშ-ის დარტყმები, რომლითაც პრეზიდენტი იმუქრებოდა, ომის დანაშაულად ჩაითვალოს.
„მე ამაზე არ ვნერვიულობ“, - განაცხადა ტრამპმა საპასუხოდ.
„იცით, რა არის ომის დანაშაული? ომის დანაშაულია ირანს მიეცეს უფლებაჰქონდეს ბირთვული იარაღი“, - დასძინა მან.
ტრამპმა არაერთხელ გააფრთხილა, რომ აშშ-მა, შესაძლოა ირანში ელექტროსადგურები, ხიდები და სხვა ინფრასტრუქტურა დაბომბოს, თუ თეირანი შეთანხმებას არ დათანხმდება ან ჰორმუზის სრუტეს არ გახსნის.
ტრამპმა ასევე განაცხადა, რომ ირანთან 45-დღიან ცეცხლის შეწყვეტის წინადადება საკმარისად კარგი არ არის, მაგრამ ძალიან მნიშვნელოვანი ნაბიჯია.
