სერბეთის პრეზიდენტმა ალექსანდარ ვუჩიჩმა განაცხადა, რომ ასაფეთქებელი მოწყობილობა აღმოაჩინეს სერბეთსა და უნგრეთს შორის დამაკავშირებელი გაზსადენის მახლობლად.
მისი თქმით, ვოევოდინის ოლქის სოფელ ველებიტთან ახლოს, გაზსადენიდან რამდენიმე ასეულ მეტრში, ორ ზურგჩანთაში აღმოაჩინეს ასაფეთქებელი ნივთიერებებით სავსე ორი დიდი შეკვრა, „რასაც შეეძლო დიდი რაოდენობით ადამიანებისთვის საფრთხე შეექმნა და სერბეთისა და უნგრეთის გაზმომარაგებისთვის მნიშვნელოვანი ზიანი მიეყენებინა“.
„ჩვენ გვჯერა, რომ ვიცით, რომელ ჯგუფს მიეკუთვნებოდნენ ის პირები, რომლებსაც ასაფეთქებელი ნივთიერებების გააქტიურების საბოლოო ნაბიჯი უნდა გადაედგათ.
მიზანი პოლიტიკური მესიჯის გაგზავნა იყო. „ჩვენ მკაცრად დავსჯით ყველას, ვისაც დავიჭერთ“, - თქვა ვუჩიჩმა.
ვუჩუჩი ესაუბრა უნგრეთის პრემიერ-მინისტრ ვიქტორ ორბანს, რომელმაც განაცხადა, რომ მან თავდაცვის საბჭოს რიგგარეშე სხდომა მოიწვია.
„გამოძიება გრძელდება. ვიქტორ ორბანთან საუბარი ახლახან დავასრულე. ნათელია, რომ გეოპოლიტიკური თამაშები თავს არ დაგვანებებს“, - განაცხადა სერბეთის პრეზიდენტმა.
