ისლამური რევოლუციის გუშაგთა კორპუსმა (IRGC) ჩინეთში წარმოებული Wing Loong II-ის თავდასხმის დრონის ჩამოგდების შესახებ განაცხადა.
ინციდენტის ამსახველი ვიდეო და ნამსხვრევების ფოტოები ინტერნეტში გავრცელდა, რაც კონფლიქტში ჩართული მხარეების შესახებ ახალ კითხვებს ბადებს, - წერს Defense Express.
ინციდენტი ქვეყნის სიღრმეში, შირაზის რეგიონში მოხდა.
ეს მიუთითებს, რომ დრონი არ ახორციელებდა სასაზღვრო დაზვერვას, არამედ პირდაპირ ირანის სტრატეგიული ობიექტების თავზე მოქმედებდა.
კერძოდ, შირაზის მახლობლად მდებარეობს ირანის სარაკეტო პროგრამის მნიშვნელოვანი ობიექტები, მათ შორის ბალისტიკური რაკეტების წარმოების ობიექტი და ე.წ. „სარაკეტო ქალაქი“.
ექსპერტების შეფასებით, დრონი შესაძლოა გამშვებ დანადგარებს ეძებდა.
მედია აღნიშნავს, რომ ის ფაქტი, რომ გამოყენებული იქნა ჩინური Wing Loong II, შესაძლოა, კონფლიქტში სხვა ქვეყნის მონაწილეობაზე მიუთითებდეს.
არც აშშ-ს და არც ისრაელს არ აქვთ ასეთი დრონები.
ამ დრონების პოტენციურ ოპერატორებს ახლო აღმოსავლეთში არაბთა გაერთიანებული საამიროები და საუდის არაბეთი წარმოადგენენ.
ანალიტიკოსები აღნიშნავენ, რომ საუდის არაბეთი ამჟამად უფრო თავშეკავებულ პოზიციას იკავებს და, ძირითადად, თავდასხმებისგან თავს იცავს.
თუმცა, არაბთა გაერთიანებულმა საამიროებმა ადრე განაცხადეს, რომ მზად არიან საპასუხო დარტყმები განახორციელონ ირანის თავდასხმების შედეგად მიყენებული დანაკარგების შემდეგ.
მედია აღნიშნავს, რომ ამ ფონზე, ჩამოგდებული დრონის ყველაზე სავარაუდო ოპერატორად არაბთა გაერთიანებული საამიროები მიიჩნევა.
Wing Loong II ამერიკული MQ-9 Reaper-ის ჩინურ ანალოგად მიიჩნევა.
მას შეუძლია 430 კგ-მდე მართვადი იარაღის გადატანა, ჰაერში 32 საათამდე დარჩენა და როგორც სადაზვერვო, ასევე დარტყმითი მისიების შესრულება.
როგორც მედია წერს, აღნიშნული ინციდენტი, შესაძლოა, კონფლიქტის გეოგრაფიის გაფართოებასა და ახალი მოთამაშეების ჩართვაზე მიუთითებდეს, რაც რეგიონში შემდგომი ესკალაციის რისკს ზრდის.
