ამერიკის დაზვერვა მიიჩნევს, რომ ნაკლებად სავარაუდოა, რომ ირანი დათანხმდეს ჰორმუზის სრუტის გახსნას, რადგან ეს მის უძლიერეს „კოზირად“ რჩება არსებულ ვითარებაში. ამის შესახებ Reuters სამ წყაროზე დაყრდნობით იუწყება.
აშშ-ის დაზვერვის ბოლოდროინდელი ანგარიშები მიუთითებს, რომ ირანი, სავარაუდოდ, არ დათანხმდება გემებისთვის ჰორმუზის სრუტეში თავისუფალი ნაოსნობის აღდგენას, რადგან ამ სტრატეგიულად მნიშვნელოვანი ნავთობის ექსპორტის არტერიის კონტროლი მის ერთადერთ რეალურ სავაჭრო იარაღად რჩება აშშ-სთან მოლაპარაკებებში.
არსებული ინფორმაციის საფუძველზე, დაზვერვის ანალიტიკოსები მიიჩნევენ, რომ თეირანი გააგრძელებს სრუტის ბლოკირებას, რათა შეინარჩუნოს მსოფლიოში ენერგორესურსების მაღალი ფასები, როგორც აშშ-ზე ზეწოლის ინსტრუმენტი და ქვეყანაში საზოგადოებრივი აზრის ზეწოლის პარალელურად პრეზიდენტ ტრამპზე ირანის წინააღმდეგ კამპანიის სწრაფად შეწყვეტისკენ უბიძგოს.
ანგარიშები ასევე მიუთითებს, რომ ომმა, შესაძლოა, ირანის რეგიონული პოზიციები კიდევ უფრო გააძლიეროს, რადგან ის ახლა წარმატებით აჩვენებს ამ სტრატეგიული მარშრუტის კონტროლის უნარს და დიდ პრობლემებს უქმნის მეზობლებს.
„ამ შემთხვევაში, ცხადია, რომ ირანმა ახლა „ძალაუფლების გემო იგრძნო“ და სრუტეზე კონტროლი აქვს, ამიტომ ის მალე არ აპირებს ამაზე უარის თქმას“, - ამბობს ერთ-ერთი წყარო.
პარასკევს, ტრამპმა, განაცხადა, რომ მას შეუძლია „ჰორმუზის სრუტის მარტივად გახსნა“, თუმცა ამას დრო დასჭირდება.
თეთრი სახლის ერთ-ერთი წარმომადგენლის თქმით, რომელმაც ანონიმურობის პირობით ისაუბრა, ტრამპი დარწმუნებულია, რომ სრუტე მართლაც „ძალიან მალე“ გაიხსნება და ირანს არ მიეცემა უფლება, ვინმეს პირობები უკარნახოს.
ამავდროულად, აშშ-ის პრეზიდენტი ამბობს, რომ ეს საკითხი სხვა ქვეყნებისთვის გაცილებით მნიშვნელოვანია, ვიდრე შეერთებული შტატებისთვის.
როგორც მედია იუწყება, ექსპერტების თქმით, სრუტის განბლოკვის მიზნით პოტენციური სამხედრო ოპერაცია სარისკოა და საიმედო შედეგის გარანტიას არ იძლევა.
ჰორმუზის სრუტის ყველაზე ვიწრო წერტილში, რომელიც ირანისა და ომანის სანაპიროებს შორის მდებარეობს, სიგანე დაახლოებით 33 კილომეტრია, თუმცა ტანკერების გადაადგილების დერეფანი ორივე მიმართულებით მხოლოდ 3 კილომეტრია, რაც გემებს მარტივ სამიზნედ აქცევს. მაშინაც კი, თუ ამერიკის ძალები სრუტის გარშემო სანაპირო ზოლსა და კუნძულებს კონტროლის ქვეშ აიყვანენ, ირანი მაინც შეძლებს ამ ვიწრო დერეფანზე თავდასხმას მისი ტერიტორიის სიღრმიდან სხვადასხვა იარაღის გამოყენებით.
ჰორმუზის სრუტის განბლოკვის მიზნით სამხედრო ოპერაციის წინააღმდეგ მსგავსი არგუმენტები გამოთქვა საფრანგეთის პრეზიდენტმა ემანუელ მაკრონმაც.
2 აპრილს, ჰორმუზის სრუტის განბლოკვის გზებზე დიდი ბრიტანეთის მიერ მოწვეულ საკონსულტაციო შეხვედრაში 40-ზე მეტმა ქვეყანამ მიიღო მონაწილეობა.
