აშშ-ის პრეზიდენტმა დონალდ ტრამპმა განაცხადა, რომ შეერთებული შტატები ირანში თავისი მიზნების მიღწევასთან „ძალიან ახლოსაა“, რამდენადაც ახლო აღმოსავლეთში სამხედრო ძალისხმევის ეტაპობრივად დასრულებას განიხილავს.
ამის შესახებ ტრამპი Truth Social-ში წერს.
„ჩვენ ვუახლოვდებით ჩვენი მიზნების მიღწევას, რამდენადაც განვიხილავთ ახლო აღმოსავლეთში ირანის ტერორისტული რეჟიმის მიმართ ჩვენი მასშტაბური სამხედრო ძალისხმევის ეტაპობრივად შემცირებას: 1. ირანის სარაკეტო, გამშვები დანადგარებისა და მასთან დაკავშირებული ყველა შესაძლებლობის სრული შემცირება; 2. ირანის სამრეწველო თავდაცვითი ბაზის განადგურება; 3 მათი ფლოტისა და საჰაერო ძალების განადგურება, მათ შორის, საზენიტო შეიარაღების; 4. არ დავუშვათ ირანის მიახლოება ბირთვულ შესაძლებლობებთან და ყოველთვის იმ პოზიციაში ყოფნა, სადაც აშშ-ს შეუძლია, სწრაფად და ეფექტურად ჰქონდეს რეაგირება ასეთ სიტუაციებში, თუკი ეს მოხდება; 5. ჩვენი ახლოაღმოსავლელი მოკავშირეების, მათ შორის ისრაელის, საუდის არაბეთის, კატარის, არაბეთის გაერთიანებული საამიროების, ბაჰრეინის, კუვეიტისა და სხვების უმაღლეს დონეზე დაცვა“, - წერს ტრამპი.
ასევე, როგორც ტრამპი ამბობს, აშშ-ს სურს უზრუნველყოს, რომ ირანს არ ჰქონდეს „ბირთვული შესაძლებლობებთან მიახლოების“ საშუალებაც კი.
ამასთან, ტრამპის თქმით, ჰორმუზის სრუტე მაქსიმალურად უნდა კონტროლდებოდეს და დაცული იყოს მათ მიერ, ვინც მას იყენებს, რადგან „შეერთებული შტატები ამას არ გააკეთებს“.
„ჰორმუზის სრუტე იქნება დაცული და გაკონტროლდება საჭიროების მიხედვით სხვა ქვეყნების მიერ, რომლებიც იყენებენ მას – აშშ ამას არ გააკეთებს! თუ გვთხოვენ, ჩვენ დავეხმარებით ამ ქვეყნებს ძალისხმევაში, მაგრამ ეს აუცილებელი აღარ იქნება, როდესაც ირანის საფრთხე აღმოიფხვრება. მნიშვნელოვანია, რომ მათთვის ეს იქნება მარტივი სამხედრო ოპერაცია“, – განაცხადა ტრამპმა.
