სამების საკათედრო ტაძრის მღვდელმსახურის, არქიმანდრიტი იოვანე მჭედლიშვილის თქმით, კათოლიკოს-პატრიარქ ილია მეორეს წესის აგების მსახურებაში, მღვდელმთავრებთან ერთად, მონაწილეობას მიიღებს მსოფლიო პატრიარქი ბართოლომეოსი.
მისივე თქმით, მსოფლიო პატრიარქი ბართლომეოსი სამების საკათედრო ტაძარში დაახლოებით 12 საათზე მივა.
"კვირის მსახურება დაიწყება დილით 09:00 საათზე. მეუფე შიო, მღვდელმთავრებთან ერთად, აღავლენს წირვას. მსოფლიოს პატრიარქის თვითმფრინავი, დაახლოებით, 11:00 საათზე დაფრინდება თბილისის აეროპორტში და 12:00 საათისთვის ველოდებით აქ. ეს არის მისი გადაწყვეტილება და წესის აგებაში მიიღებს მონაწილეობას. ის აუგებს წესს მღვდელმთავრებთან ერთად", - თქვა არქიმანდრიტმა.
მან ასევე აღნიშნა, რომ მსახურების დასრულების შემდეგ, სტუმრების სიტყვით გამოვლენ.
"შემდეგ იქნება სიტყვით გამოსვლა, ქადაგება სხვადასხვა მოღვაწეებისა, უწმინდესის შესახებ. უკვე შემდეგ სიონში გადავასვენებთ უწმინდესს და იქ დაიკრძალება". - განაცხადა არქიმანდრიტმა.
2026 წლის 17 მარტს, გვიან საღამოს, 93 წლის ასაკში გარდაიცვალა საქართველოს მართლმადიდებელი ეკლესიის პატრიარქი ილია მეორე.
