მინდა, პირველ რიგში, რეჟიმის ყველა მსხვერპლს ვუთხრა: გუშინ თქვენ მოიპოვეთ ახალი მნიშვნელოვანი მექანიზმი იმისთვის, რომ ამ რეჟიმმა პასუხი აგოს სამართლებრივად ყველა დარღვევაზე, - ამის შესახებ „ლელო-ძლიერი საქართველოს“ ლიდერმა, სალომე სამადაშვილმა განაცხადა, რითაც გამოეხმაურა ეუთო-ს „მოსკოვის მექანიზმის“ ფარგლებში გამოქვეყნებულ ანგარიშს.
“მსურს გამოვეხმაურო გუშინ გამოქვეყნებულ ეუთო-ს „მოსკოვის მექანიზმის“ გამოყენებით მომზადებულ დასკვნას.
მომავალში, როდესაც ისტორია შეაფასებს ყველა გადამწყვეტ მომენტს, რომელმაც საქართველოს კონსტიტუციის და საერთაშორისო სამართლის ნორმების დამრღვევ, ძალადობაზე დამყარებულ რეჟიმთან ბრძოლაში, ქართველ ხალხი გამარჯვებასთან დააახლოვა, დარწმუნებული ვარ, 2026 წლის 12 მარტი მნიშვნელოვანი თარიღი იქნება.
დასკვნამ დაადგინა საქართველოში ადამიანის უფლებების და პოლიტიკური უფლებების სისტემატური დარღვევა, ქართველების წინააღმდეგ ხელისუფლების მიერ ძალადობის სისტემატური გამოყენების ფაქტები და საერთაშორისო საზოგადოებას მოუწოდა ყველა მძლავრი სამართლებრივი მექანიზმის გამოყენებისკენ რეჟიმის წინააღმდეგ, თუ ივანიშვილის მთავრობა არ შეასრულებს დასკვნით გათვალისწინებული რეკომენდაციებს.
ძალიან მნიშვნელოვანია მითითება ჰააგაში სისხლის სამართლის საერთაშორისო სასამართლოს მექანიზმის ამუშავებაზე.
მინდა, რომ პირველ რიგში ვუთხრა რეჟიმის ყველა მსხვერპლს, ადამიანებს, ვინც უკანონოდ არიან დღეს დამწყვდეული ციხეებში, ადამიანებს, ვინც სცემეს, მოწამლეს, დაამცირეს, ადამიანებს, ვისი ოჯახებიც ფინანსური განადგურების გზას გაუყენეს არაადამიანური ჯარიმების გამოყენებით და ყველას, ვინც გახდა ამ რეჟიმის მსხვერპლი, რომ გუშინ თქვენ მოიპოვეთ ახალი მნიშვნელოვანი მექანიზმი, ჩვენ მოვიპოვეთ მექანიზმის იმისთვის, რომ ამ რეჟიმმა პასუხი აგოს სამართლებრივად ყველა დარღვევაზე.
გუშინდელი ანგარიშის შემდეგ, რეჟიმის ყველა მსხვერპლს ეძლევა შესაძლებლობა, ჰააგაში სისხლის სამართლის საერთაშორისო სასამართლოს პროკურორის ოფისს მიმართოს შესაბამისი გამოძიების დაწყების მოთხოვნით. იმედი მაქვს, რომ ამ შესაძლებლობით ისარგებლებენ ადამიანები, რომლებიც რეჟიმის ძალადობის ყველა მსხვერპლი გახდნენ.
„პოლიტიკური პატიმრების დაუყოვნებლივ გათავისუფლება, პოლიტიკური ოპონენტების დევნის შეწყვეტა, მოქალაქეების წინააღმდეგ ძალადობის ფაქტების, მათ შორის უცნობი ქიმიური ნივთიერებით მოწამვლის ფაქტების დაუყოვნებლივ გამოძიება, რეპრესიული კანონების გაუქმება, სამართლიანი და თავისუფალი არჩევნებისთვის ქვეყნის მომზადება - ესაა მოკლედ ის ყველაზე მნიშვნელოვანი რეკომენდაციები, რომელიც ივანიშვილის რეჟიმმა დაუყოვნებლივ უნდა შეასრულოს, თუ სურს თავიდან აიცილოს შემდგომი არა მხოლოდ საერთაშორისო იზოლაცია, არამედ უკვე საერთაშორისო სამართლებრივი დევნაც.
თუ რეჟიმი გააგრძელებს საერთაშორისო თანამეგობრობის მოთხოვნების იგნორირებას, ეუთო-ს მიერ გამოქვეყნებული დასკვნის გამოყენება საერთაშორისო სამართლებრივი გზებით, რეჟიმზე ზეწოლის გასაზრდელად - იქნება ეს ჰააგის სასამართლო, სტრასბურგის სასამართლო, თუ რეჟიმის წინააღმდეგ ტარგეტირებული სანქციების ამოქმედება, როგორც ამას მოითხოვს, ეუთო-ს ანგარიშიც, ასევე გუშინ ევროპარლამენტის მიერ მიღებული რეზოლუცია, რჩება მნიშვნელოვან ინსტრუმენტად საქართველოს მოქალაქეების თავისუფლების დასაცავად.
ჩვენი დრო და ენერგია დღეს უნდა იხარჯებოდეს საქართველოს ევროკავშირში სწრაფ გაწევრიანებაზე, სიღარიბის დამარცხებაზე, ჩვენი საერთაშორისო სატრანზიტო პოტენციალის ათვისებაზე, მათ შორის ანაკლიის პორტის მშენებლობის გზით, ჩვენი უსაფრთხოების და კეთილდღეობის მყარი გარანტიების მოპოვებაზე, დასავლეთთან მჭიდრო თანამშრომლობით. ამის ნაცვლად საკუთარი ხალხის წინააღმდეგ მოქმედი მმართველი რეჟიმის მოგერიებაზე გვიწევს ამ დროის კარგვა და ამასთან ერთად ვკარგავთ ისტორიულ შესაძლებლობებს. ეს ანომალია უნდა დასრულდეს, ქვეყანა უნდა დაუბრუნდეს სწორი განვითარების გზას, ქართველ ხალხს სჭირდება მთავრობა, რომელიც ემსახურება მას და მის ინტერესებს. მოსკოვის მექანიზმის დასკვნა, ამ ბრძოლაში გამარჯვების მოსაპოვებლად მნიშვნელოვანი ინსტრუმენტია”, - განაცხადა სამადაშვილმა.
ცნობისთვის, ეუთო-მ „მოსკოვის მექანიზმის“ ფარგლებში საქართველოზე მომზადებული ანგარიში გამოაქვეყნა. ანგარიშში საქართველოში 2024 წლის გაზაფხულიდან განვითარებული მოვლენებია განხილული და რეკომენდაციებია მოცემული. დოკუმენტის თანახმად, მთავარი მიგნებებია, რომ მანდატით გათვალისწინებულ პერიოდში საქართველოში დემოკრატიული უკუსვლა დაფიქსირდა. ანგარიშის თანახმად, დემონსტრანტების, პოლიტიკური ოპოზიციის ლიდერებისა და ჟურნალისტების წინააღმდეგ ძალადობა გაერთიანებული იყო დანაშაულების ჩამდენების სრულ დაუსჯელობასთან. მთავრობამ ეტაპობრივად შეამცირა გამოხატვისა და შეკრების თავისუფლებები ახალი კანონების მიღებით, რომლებიც სამოქალაქო საზოგადოებას, პოლიტიკურ ოპოზიციას, დამოუკიდებელ მედიას და LGBT+ საზოგადოებას იღებენ მიზანში.
ანგარიშის თანახმად, საქართველომ „უცხოური გავლენის გამჭვირვალობაზე კანონი” (TFI), “უცხოური აგენტების რეგისტრაციის აქტი” (FARA), და “გრანტების შესახებ კანონში” უცხოურ გრანტებთან დაკავშირებული შესწორებები უნდა გაიწვიოს. ანგარიშში ასევე მოცემულია რეკომენდაციები საქართველოსთვის, ეუთოს წევრი ქვეყნებისა და საერთაშორისო საზოგადოებისთვის.
