აშშ-ის პრეზიდენტი დონალდ ტრამპი აცხადებს, რომ ირანის გოგონათა დაწყებითი სკოლის დაბომბვა „ირანმა განახორციელა“. ამის შესახებ ტრამპმა Air Force One-ს ბორტზე ჟურნალისტებს განუცხადა.
შეკითხვაზე, იყო თუ არა აშშ პასუხისმგებელი ირანის სამხრეთით მდებარე ქალაქ მინაბში დაწყებით სკოლაზე 28 თებერვალს მომხდარ თავდასხმაზე, რომლის დროსაც სულ მცირე 150 ადამიანი დაიღუპა, ტრამპმა ირანი დაადანაშაულა.
„ჩემი აზრით, იქიდან გამომდინარე, რაც მე ვნახე, ეს ირანმა გააკეთა. ჩვენ გვჯერა, რომ ეს ირანმა გააკეთა, რადგან, როგორც იცით, ისინი ძალიან არაზუსტად იყენებენ თავიანთ საბრძოლო მასალას. მათ საერთოდ არ აქვთ სიზუსტე,“ - განაცხადა ტრამპმა.
ჟურნალისტმა იგივე კითხვა ომის მდივან პიტ ჰეგსეთსაც დაუსვა. მან უპასუხა: „ჩვენ, რა თქმა უნდა, ვიძიებთ, მაგრამ ერთადერთი მხარე, რომელიც მშვიდობიან მოსახლეობას ესხმის თავს, ირანია“.
ქალაქ მინაბის სკოლა ირანის სამხედრო ობიექტებისა და ხელმძღვანელობის წინააღმდეგ აშშ-სა და ისრაელის ფართომასშტაბიანი დარტყმების ფონზე დაიბომბა,.
ირანის ხელისუფლებამ თავდასხმაში აშშ და ისრაელი დაადანაშაულა. ისრაელმა განაცხადა, რომ მას „არ აქვს ინფორმაცია“ ტერიტორიაზე მისი თავდაცვის ძალების ოპერაციების შესახებ, თუმცა განაცხადა, რომ ინციდენტს იძიებს.
BBC Verify-ის მიერ თანამგზავრული გამოსახულების ანალიზის შედეგად გამოვლინდა დარტყმის მრავალი წერტილი და ხანძრის კვალი, რაც იმაზე მიუთითებს, რომ სკოლაზე შესაძლოა ერთზე მეტი დარტყმა განხორციელდა
თუმცა, საბრძოლო მასალის ფრაგმენტების დამატებითი ვიდეომასალის გარეშე შეუძლებელია დანამდვილებით იმის დადგენა, თუ ვინ არის პასუხისმგებელი.
