უკრაინა ახლო აღმოსავლეთის ქვეყნებში ირანის დრონების წინააღმდეგ საბრძოლველად სამხედროებს გაგზავნის, - ის შესახებ უკრაინის პრეზიდენტმა ვოლოდიმირ ზელენსკიმ განაცხადა.
ახლო აღმოსავლეთში არსებული ვითარების შესახებ შეხვედრის შემდეგ, ზელენსკიმ განაცხადა, რომ ის ესაუბრა ევროპელ და ამერიკელ პარტნიორებს და ასევე მოლაპარაკებები გამართა არაბთა გაერთიანებული საამიროების, კატარის, იორდანიისა და ბაჰრეინის ლიდერებთან.
„ისინი ყველა სერიოზული გამოწვევის წინაშე დგანან და ამაზე ღიად საუბრობენ: ირანის თავდასხმის დრონები იგივე „შაჰედებია“, რომლებიც ამ ომის ოთხი წლის განმავლობაში თავს ესხმოდნენ ჩვენს ქალაქებსა და სოფლებს, ჩვენს უკრაინულ ინფრასტრუქტურას. უკრაინას შეუძლია დაეხმაროს სიცოცხლის დაცვას და სიტუაციის სტაბილიზაციას. ჩვენი პარტნიორები ამ საკითხთან დაკავშირებით ჩვენთან დაკავშირებიან“, - თქვა უკრაინის ლიდერმა.
ზელენსკიმ მთავრობას, სამხედრო სარდლობას და დაზვერვის ხელმძღვანელებს დაავალა, ახლო აღმოსავლეთის ქვეყნებისთვის „წარმოადგინონ მხარდაჭერის ვარიანტები“ და დაეხმარონ მათ ისე, რომ არ დაასუსტონ უკრაინის თავდაცვა.
„ჩვენს სამხედროებს საჭირო შესაძლებლობები აქვთ. უკრაინელი ექსპერტები ადგილზე იმუშავებენ და ჯგუფები უკვე აწარმოებენ მოლაპარაკებებს ამ საკითხთან დაკავშირებით. და ჩვენ მზად ვართ, დავეხმაროთ სიცოცხლის დაცვაში, მშვიდობიანი მოსახლეობის დაცვაში და მხარი დავუჭიროთ სიტუაციის სტაბილიზაციისა და, კერძოდ, რეგიონში უსაფრთხო ნავიგაციის აღდგენის რეალურ ძალისხმევას“, - განაცხადა მან.
ზელენსკიმ არ დააკონკრეტა, თუ ზუსტად როდის გაემგზავრებიან უკრაინელი სპეციალისტები ახლო აღმოსავლეთში. ასევე არ დაკონკრეტებულა იმ ექსპერტების რაოდენობა, რომლებიც გაემგზავრებიან.
