დიდი ბრიტანეთის პრემიერ-მინისტრმა კირ სტარმერმა პარლამენტში სიტყვით გამოსვლისას განაცხადა, რომ ამერიკული ბომბდამშენები ირანზე თავდასხმებს არ ახორციელებენ კვიპროსში მდებარე აკროტირის საჰაერო ბაზიდან, რომელზეც დრონებმა უკვე ორჯერ განახორციელეს თავდასხმა.
უფრო ადრე, სტარმერმა განაცხადა, რომ მან აშშ-ს ირანის წინააღმდეგ ბრიტანული ბაზების გამოყენების ნებართვა მისცა. BBC-ის ინფორმაციის თანახმად, საუბარია ორ ბაზაზე: დიდ ბრიტანეთში მდებარე ფერფორდსა და ინდოეთის ოკეანეში მდებარე დიეგო გარსიაზე.
როგორც BBC-ის კორესპონდენტი იუწყება, თემთა პალატაში სტარმერმა ასევე განაცხადა, რომ იგი კვლავ მიიჩნევს, რომ მისი გადაწყვეტილება, თავი შეეკავებინა ირანზე აშშ-სა და ისრაელის პირველ დარტყმებში მონაწილეობისგან, სწორი იყო.
„პრეზიდენტმა ტრამპმა გამოთქვა უკმაყოფილება ჩვენს გადაწყვეტილებასთან დაკავშირებით, რომ არ ჩავერთეთ პირველ დარტყმებში, თუმცა ჩემი პასუხისმგებლობაა გადავწყვიტო, რა არის ბრიტანეთის ინტერესებში. ეს არის ის, რაც მე გავაკეთე და ვფიქრობ, რომ სწორად მოვიქეცი“, - განაცხადა ბრიტანეთის პრემიერ-მინისტრმა.
კირ სტარმერმა განმარტა, რომ მისი აზრით, ირანის მთავრობის დამხობა მხოლოდ საჰაერო დარტყმებით, სახმელეთო შეჭრის გარეშე შეუძლებელი იქნება და რომ, ზოგადად, სამხედრო ქმედებებს სამართლებრივი გამართლება და კარგად გააზრებული გეგმა სჭირდება მიღწევადი მიზნებით.
„ეს არის პრინციპები, რომელთა საფუძველზეც გადავწყვიტე, არ მივიღო მონაწილეობა აშშ-სა და ისრაელის შეტევით დარტყმებში,“ - განაცხადა სტარმერმა
ამავდროულად, სტარმერის თქმით, ირანის მიერ რეგიონის სხვადასხვა ქვეყანაში განლაგებულ სამიზნეებზე დარტყმები ასევე საფრთხეს უქმნის ბრიტანეთის მოქალაქეებსა და ინტერესებს და შესაბამისად, ბრიტანეთს არ შეუძლია ამ საფრთხის უგულებელყოფა.
