ეს არ არის ერთჯერადი, ერთღამიანი ოპერაცია, - ამის შესახებ აშშ-ის შეიარაღებული ძალების გაერთიანებული შტაბების მეთაურმა, გენერალმა დენ კეინმა ბრიფინგზე განაცხადა.
მისი თქმით, სამხედრო მიზნების მიღწევას, რომლებიც ცენტრალურ სარდლობასა და გაერთიანებულ ძალებს დაეკისრათ, გარკვეული დრო დასჭირდება.
მისივე თქმით, ოპერაციის მსვლელობისას აშშ დანაკარგებს ელის.
"ჩვენ ველით დამატებით დანაკარგებს და, როგორც ყოველთვის, ვიმუშავებთ აშშ-ის დანაკარგების მინიმიზაციაზე", - განაცხადა კეინმა.
"100-ზე მეტი თვითმფრინავი აფრინდა ხმელეთიდან და ზღვიდან - გამანადგურებლები, საწვავის შემავსებელი ტანკერები, საჰაერო ადრეული გაფრთხილების და ელექტრონული ბრძოლის თვითმფრინავები, აშშ-დან აფრენილი ბომბდამშენები და უპილოტო პლატფორმები — ერთიანი, სინქრონიზებული ტალღის სახით.
ეს იყო დღისით განხორციელებული დარტყმა, რომელიც ეფუძნებოდა ისრაელის თავდაცვის ძალების მიერ ჩატარებულ ტრიგერულ მოქმედებას და უზრუნველყოფილი იყო აშშ-ის დაზვერვის მიერ. პირველი გასროლები ზღვიდან განხორციელდა. აშშ-ის საზღვაო ძალების მიერ გაშვებული იყო „ტომაჰოკები“. ისინი მიუახლოვდნენ ირანის საზღვაო ძალებს და დაიწყეს დარტყმები ირანის სამხრეთ ფლანგზე, - განაცხადა კეინმა.
მისი თქმით, მასშტაბური და ყოვლისმომცველი შეტევის დროს პირველ 24 საათში დარტყმები ათასზე მეტ სამიზნეზე განხორციელდა.
"მათთვის, ვინც ჩვენს გადაწყვეტილებას გამოცდის ან დაემუქრება შეერთებულ შტატებს, ჩვენს მოკავშირეებს ან ჩვენს ინტერესებს. მკაფიოდ უნდა გაიგოთ: ჩვენ შეგვიძლია თქვენამდე მივაღწიოთ. ჩვენ შეგვიძლია ბრძოლა გავაგრძელოთ, გავაფართოოთ და საბოლოოდ გავიმარჯვოთ," - განაცხადა კეინმა.
,
