საფრანგეთის პრეზიდენტმა ემანუელ მაკრონმა გაერო-ს უშიშროების საბჭოს სასწრაფო სხდომის მოწვევა მოითხოვა და აღნიშნა, რომ აშშ-ს, ისრაელსა და ირანს შორის ომის დაწყებას საერთაშორისო მშვიდობისა და უსაფრთხოებისთვის „სერიოზული შედეგები“ მოჰყვება. ამის შესახებ Reuters იუწყება.
აღნიშნულია, რომ მაკრონმა უკვე გამართა ცალკეული მოლაპარაკებები საუდის არაბეთის, არაბთა გაერთიანებული საამიროების, კატარის, იორდანიის ლიდერებთან და ქურთისტანის ავტონომიური რეგიონის პრეზიდენტთან.
მაკრონის თქმით, საფრანგეთი მზადაა, მათი მოთხოვნის შემთხვევაში, განათავსოს საჭირო რესურსები უახლოესი პარტნიორების დასაცავად.
„მიმდინარე ესკალაცია ყველასთვის საშიშია. ეს უნდა დასრულდეს. ირანის რეჟიმმა უნდა გააცნობიეროს, რომ მას ახლა სხვა გზა არ აქვს, გარდა იმისა, რომ კეთილსინდისიერ მოლაპარაკებებში ჩაერთოს თავისი ბირთვული და ბალისტიკური რაკეტების პროგრამების, ასევე რეგიონის დესტაბილიზაციის გამომწვევი ქმედებების დასასრულებლად.
ეს აბსოლუტურად აუცილებელია ახლო აღმოსავლეთში ყველას უსაფრთხოებისთვის. ირანელ ხალხს ასევე უნდა ჰქონდეს თავისუფალი საკუთარი მომავლის ფორმირებაში. ისლამური რეჟიმის მიერ ჩადენილი მასობრივი ხოცვა-ჟლეტები მის დისკრედიტაციას ახდენს და მოითხოვს, რომ ხალხს ჰქონდეს ხმის უფლება. რაც უფრო მალე, მით უკეთესი“, - აღნიშნა მაკრონმა.
