ევროპარლამენტის პრეზიდენტმა რობერტა მეცოლამ გამოაცხადა უკრაინისთვის 2026-2027 წლებისთვის 90 მილიარდი ევროს ოდენობის სესხის ხელმოწერის შესახებ.
„მე ახლახან ხელი მოვაწერე 90 მილიარდ ევროს ოდენობის სესხს ევროპარლამენტის სახელით უკრაინის მხარდასაჭერად“, - დაწერა მან Х-ზე.
მისი თქმით, გამოყოფილი თანხები უკრაინას დაეხმარება სასიცოცხლოდ მნიშვნელოვანი საზოგადოებრივი სერვისების მუშაობის მხარდაჭერაში, უკრაინის ძლიერი თავდაცვის შენარჩუნებაში, „საერთო უსაფრთხოებისა და თავისუფლების დაცვაში და ევროპაში უკრაინის მომავლის უზრუნველყოფაში“.
უკრაინული მედიის ცნობით, ევროკავშირის ზოგად საქმეთა საბჭომ დღეს მიიღო ორი დოკუმენტი, რომელიც უკრაინისთვის სესხის გაცემაზე ტექნიკური სამუშაოების გაგრძელების საშუალებას იძლევა, თუმცა თანხების გაცემისთვის აუცილებელი კიდევ ერთი კანონპროექტი უნგრეთის მიერ კვლავ დაბლოკილია.
ევროკომისარმა ვალდის დომბროვსკისმა გუშინ განაცხადა, რომ ევროკომისია გააგრძელებს მუშაობას უკრაინისთვის 90 მილიარდი ევროს ოდენობის სესხის პირველი ტრანშის გამოყოფაზე 2026 წლის აპრილში, მიუხედავად იმისა, რომ უნგრეთი ბლოკავს ამ პროცესს.
