მიუნხენში ირანის მთავრობის წინააღმდეგ მასშტაბური დემონსტრაცია გაიმართა. პოლიციის ცნობით, აქციაში მოსალოდნელზე მნიშვნელოვნად მეტი - დაახლოებით 200 000 ადამიანი მონაწილეობდა.
ღონისძიება შაბათს, 14 თებერვალს, მიუნხენის უსაფრთხოების კონფერენციის (MSC) ფონზე გაიმართა, რომელსაც ესწრებოდა დევნილი შაჰის ვაჟი, აშშ-ში მცხოვრები და ემიგრაციაში მყოფი ირანელი ოპოზიციონერი რეზა ფეჰლევი.
დღის განმავლობაში ის პირადად იმყოფებოდა აქციაზე.
წვიმის მიუხედავად, მომიტინგეები მიუნხენის ცენტრში, ტერეზინვიზეზე შეიკრიბნენ.
როდესაც ფეჰლევი სცენაზე ავიდა, ბევრმა მომიტინგემ, რომლებსაც მისი პორტრეტები ეჭირათ ხელში, სკანდირება დაიწყო: „გაუმარჯოს შაჰს!“. ირანის ამჟამინდელი ხელმძღვანელობის წინააღმდეგ პროტესტი ოპოზიციურმა ჯგუფმა Munich Circle-მგამართა.
მიტინგზე გამომსვლელებმა ირანში ხელისუფლების მშვიდობიანი და დემოკრატიული გადაცემისკენ მოუწოდეს.
მონაწილეებმა ხაზი გაუსვეს, რომ თეირანის ამჟამინდელმა ლიდერებმა პასუხისმგებლობა უნდა აიღონ საკუთარი მოსახლეობის წინააღმდეგ ძალადობასა და რეპრესიებზე. შაბათს საპროტესტო აქციები გაიმართა არა მხოლოდ მიუნხენში, არამედ მსოფლიოს რამდენიმე სხვა დიდ ქალაქში, მათ შორის ტორონტოსა და ლოს ანჯელესში.
რეზა ფეჰლევიმ აქციის დაწყებამდე განაცხადა, რომ ირანის პოლიტიკური სისტემის შეცვლის დრო დადგა.
მან აღნიშნა, რომ ქვეყანაში ბოლო დროს გამართული საპროტესტო აქციების მონაწილეებს არ სურდ არსებული ინსტიტუტების რეფორმირება; ისინი რეჟიმის სრულად შესაცვლელად საერთაშორისო მხარდაჭერას ითხოვენ.
აშშ-ის პრეზიდენტ დონალდ ტრამპისადმი მიმართვისას, ფეჰლევიმ განაცხადა, რომ ირანელებმა მოისმინეს მისი განცხადებები, რომ დახმარება „გზაშია“ და იმედი გამოთქვა, რომ აშშ მართლაც დაეხმარება.
მან აღნიშნა, რომ ქვეყანაში ბევრი ენდობა ამერიკის ლიდერს და იმედოვნებს, რომ ის ირანის პროცესებში აუცილებლად ჩაერევა.
