უკრაინამ რუსეთისგან მტკიცე პასუხები ვერ მიიღო მომავალ კვირას დაგეგმილ მოლაპარაკებებთან დაკავშირებით, თუმცა კომპლექს “ორეშნიკთან” დაკავშირებით რუსული მანიპულაციები კვლავ გრძელდება. ამის შესახებ უკრაინის პრეზიდენტმა ვოლოდიმირ ზელენსკიმ განაცხადა.
„უკრაინა შეხვედრისთვის მზადაა. სამწუხაროდ, რუსეთიდან ჯერ კიდევ არ არის ცალსახა პასუხები იმასთან დაკავშირებით, თუ რა არის შემოთავაზებული მომავალ კვირას; ჯერჯერობით მხოლოდ „ორეშნიკთან“ დაკავშირებული მანიპულაციების შესახებ გავიგეთ. ეს ნამდვილად არ ნიშნავს მშვიდობას“, - თქვა ზელენსკიმ.
11 თებერვალს ზელენსკიმ განაცხადა, რომ ამერიკულმა მხარემ შეხვედრა მომავალ კვირას მაიამიში შესთავაზა. უკრაინამ მაშინვე დაადასტურა თავისი მზადყოფნა, თუმცა რუსეთი ყოყმანობს.
„ჩვენ მზად ვართ; ჩვენთვის არ აქვს მნიშვნელობა, მაიამიში შევხვდებით თუ აბუ დაბიში, მთავარია შედეგი მივიღოთ“, - აღნიშნა ზელენსკიმ.
