აშშ-ის სამხედროებმა ირანთან დაძაბულობის ფონზე, კატარში მდებარე ბაზაზე მობილურ გამშვებ დანადგარებზე რაკეტები განალაგეს, რაც მათი უფრო სწრაფად გადაადგილების შესაძლებლობას ნიშნავს. ამის შესახებ ინფორმაციას Reuters სატელიტური ფოტოების ანალიზზე დაყრდნობით ავრცელებს.
„ახლო აღმოსავლეთის უდიდეს ბაზაზე, კატარში, ალ უდეიდში განლაგებულმა აშშ-ის ძალებმა იანვრიდან ირანთან მზარდი დაძაბულობის ფონზე, სატვირთოებზე დამონტაჟებულ გამშვებ სისტემებზე რაკეტები განათავსეს, რაც იმას ნიშნავს, რომ მათი უფრო სწრაფად გადატანა შესაძლებელი იქნება“, - იტყობინება სააგენტო.
Contested Ground-ის კვლევითი პროექტის ანალიტიკოსმა უილიამ გუდჰაინდმა გამოცემას განუცხადა, რომ თებერვლის დასაწყისში და იანვარში გადაღებული სატელიტური ფოტოების შედარებამ რეგიონში თვითმფრინავების და სხვა სამხედრო აღჭურვილობის შეკრება აჩვენა.
მისი თქმით, თებერვლის დასაწყისში ალ უდეიდის საჰაერო ბაზაზე ჩანდა M983-ის მძიმე ყველგანმავალ სატვირთოებზე დამონტაჟებული Patriot-ის ტიპის რაკეტები.
