აშშ-ის პრეზიდენტი დონალდ ტრამპი 19 თებერვალს, ვაშინგტონში „მშვიდობის საბჭოს“ პირველ ოფიციალურ შეხვედრას გამართავს. ინფორმაციას Bloomberg ავრცელებს.
„მშვიდობის საბჭო“, რომელსაც დონალდ ტრამპი ხელმძღვანელობს, თავდაპირველად ღაზას რეკონსტრუქციაზე პასუხისმგებელ ორგანოდ ჩამოყალიბდა, თუმცა, ორგანიზაციის წესდების თანახმად, მის მისიას მთელ მსოფლიოში არსებული კონფლიქტების მოგვარება წარმოადგენს.
Bloomberg აღნიშნავს, რომ „მშვიდობის საბჭო“ ტრამპის 20-პუნქტიანი გეგმის ერთ-ერთი მთავარი ელემენტია, რომელმაც 2025 წლის ოქტომბერში ისრაელსა და „ჰამასს“ შორის ცეცხლის შეწყვეტის მიღწევაში მნიშვნელოვანი როლი ითამაშა. საბჭოს წევრების პირველი შეხვედრა ტრამპის ხელმძღვანელობით იანვარში, შვეიცარიის ქალაქ დავოსში, მსოფლიო ეკონომიკური ფორუმის ფარგლებში გაიმართა. შეხვედრაში მონაწილეობდნენ დაახლოებით 20 ქვეყნის წარმომადგენლები. ამჟამად საბჭოს შემადგელობაში 27 სახელმწიფო შედის. ევროკავშირის წევრი სახელმწიფოების უმეტესობამ, მათ შორის, საფრანგეთმა, გერმანიამ, იტალიამ და ესპანეთმა საბჭოში გაწევრიანებაზე უარი განაცხადეს.
